ᓄᓇᕗᑦᒥ ᐆᒻᒪᖅᑯᑏᑦ
ᐃᖏᕐᕋᓂᕗᑦ ᖃᓄᖅ ᑕᐃᑯᙵᓚᐅᖅᐱᑕ?
ᐃᓄᐃᑦ ᓄᑖᓂᒃ ᓴᖅᑭᑦᑎᕙᓪᓕᐊᖏᓐᓇᐅᔭᕐᒪᑕ ᖃᐅᒪᖃᖅᑎᑦᑎᓂᕐᒥᒃ ᐅᖅᑰᓴᖅᑎᑦᑎᓂᕐᒥᒡᓗ, ᓴᖅᑭᑕᐅᓚᐅᖅᑎᓐᓇᒍᓘᓐᓃᑦ ᐆᒻᒪᖅᑯᑎ. ᖁᓪᓕᖅ—ᐱᖅᑯᓯᑐᖃᖅᑎᒍᑦ ᖃᐅᒻᒪᖅᑯᑎ ᐊᒻᒪ ᐅᖅᑰᓴᐅᑎ—ᐊᑐᖅᑕᐅᖃᑦᑕᖅᓯᒪᕗᖅ ᐃᓄᖕᓄᑦ ᐅᑭᐅᒐᓴᖕᓄᑦ ᐅᖅᑰᓴᕈᑕᐅᓪᓗᓂ ᐊᒻᒪ ᖃᐅᒻᒪᕈᑕᐅᓪᓗᓂ ᐊᕙᓗᒋᔭᒥᖕᓂᒃ. ᓴᓇᐅᒐᐅᓪᓗᓂ ᓴᓗᒻᒪᖅᓴᐅᑎᒥᒃ, ᐅᑭᐅᖅᑕᖅᑐᒥ ᑲᖒᔭᕐᓂᒃ ᐅᕝᕙᓘᓐᓃᑦ ᐃᔾᔪᕐᒥᒃ ᐃᑯᒻᒪᖅᑯᑎᒧᑦ, ᐊᒻᒪᓗ ᐅᖅᓱᐊᓗᖃᖅᑎᑕᐅᒐᔪᒃᑐᖅ ᑕᕆᐅᕐᒥᐅᑕᓄᑦ ᐆᒪᔪᕐᓄᑦ ᐅᖅᓱᐊᓗᖕᒧᑦ, ᖁᓪᓕᖅ ᑭᒡᒐᖅᑐᐃᔪᖅ ᐃᓄᐃᑦ ᓯᓚᑐᓂᖏᓐᓂᒃ ᐊᒻᒪᓗ ᖃᓄᖅᑑᕈᓐᓇᕐᓂᖏᓐᓂᒃ. ᐊᑐᕐᓂᖅ ᓄᓇᓕᖕᓂ ᐊᑐᒃᑲᓐᓂᕈᓐᓇᖅᑐᓂᒃ ᐊᓐᓇᐅᒪᓇᓱᐊᕐᓂᖅ ᐅᑭᐅᖅᑕᖅᑐᒥ ᐊᔪᕐᓇᕈᓐᓃᖅᑎᑦᑎᓚᐅᖅᑐᖅ.
1950-ᖏᓐᓂ, ᐅᖅᓱᐊᓗᖕᒧᑦ ᐊᐅᓚᐅᑎᖃᕐᕖᑦ ᓴᖅᑭᑕᐅᕙᓪᓕᐊᓕᓚᐅᖅᐳᑦ ᓄᓇᕗᑦᒥ, ᐱᓗᐊᖅᑐᒥᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᒻᒪ ᐅᓇᑕᖅᑐᒃᓴᓄᑦ. ᓄᓇᕗᑦᒥ ᓄᓇᑖᕐᓂᕐᒧᑦ ᐊᖏᕈᑏᑦ ᐊᑎᓕᐅᖅᑕᐅᓚᐅᖅᑎᓪᓗᒍ ᐊᒻᒪᓗ ᓄᓇᕗᑦ ᓇᖕᒥᓂᖅ ᓄᓇᖁᑎᒋᓕᖅᑎᓪᓗᒍ, ᑕᐃᒃᑯᐊ ᐅᖅᓱᐊᓗᖕᒧᑦ ᐊᐅᓚᐅᑎᖃᕐᕖᑦ ᓄᒃᑎᖅᑕᐅᓚᐅᖅᓯᒪᔪᑦ ᒐᕙᒪᒃᑯᓐᓄᑦ ᓇᖕᒥᓂᕆᔭᐅᔪᓄᑦ ᐆᒻᒪᖅᑯᑎᓕᕆᔨᒃᑯᓐᓄᑦ (ᓄᓇᕗᑦᒥ ᐆᒻᒪᖅᑯᑎᓕᕆᔨᒃᑯᓐᓄᑦ ᓯᕗᓪᓕᕐᒥ, ᒫᓐᓇ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ), ᓇᖕᒥᓂᕆᔭᐅᔪᑦ ᐊᐅᓚᑕᐅᓪᓗᑎᒡᓗ ᐅᓪᓗᒥᒧᑦ.
ᑖᓐᓇ ᓄᒃᑎᕆᓂᖅ ᐅᖅᓱᐊᓗᑐᐃᓐᓇᕐᒧᑦ ᐆᒻᒪᖅᑯᑎᓄᑦ ᓴᖅᑭᓚᐅᖅᑐᖅ ᐊᒃᓱᕈᖅᑎᑕᐅᕙᓪᓕᐊᑎᓪᓗᒋᑦ ᐃᓄᐃᑦ ᖃᓪᓗᓈᑦ ᓄᓇᖓᓐᓂ ᒐᕙᒪᐅᔪᓄᑦ ᐊᒻᒪᓗ ᑐᒃᓯᐊᕐᕕᐅᔪᓄᑦ ᐊᑕᐅᓯᕐᒦᖁᔭᐅᓪᓗᑎᒃ ᐊᕐᕌᒍᓕᒫᖅ, ᑭᒡᒐᖅᑐᐃᓪᓗᓂ ᐊᖏᔪᒥᒃ ᐊᓯᔾᔨᕐᓂᐅᔪᒥᒃ ᐃᓄᐃᑦ ᐃᓕᖅᑯᓯᑐᖃᖏᓐᓄᑦ. ᓄᓇᕗᑦᒥᐅᑦ ᐃᓱᒪᓕᐅᕈᓐᓇᓚᐅᙱᓚᑦ ᐆᒻᒪᖅᑯᑎᖃᕐᕖᑦ ᓴᓇᔭᐅᔭᕆᐊᖃᕐᒪᖔᑕ, ᓇᓂ ᓴᓇᔭᐅᓂᐊᕐᒪᖔᑕ, ᐅᕝᕙᓘᓐᓃᑦ ᑭᒃᑯᑦ ᐱᕚᓪᓕᕈᑎᖃᕋᔭᕐᒪᖔᑕ ᐊᒃᑐᖅᑕᐅᓂᖃᕋᔭᕐᒪᖔᑕᓘᓐᓃᑦ ᐆᒻᒪᖅᑯᑎᖃᕐᕕᖕᓂᑦ. ᑕᒪᓐᓇ ᐊᑐᖅᑕᐅᕙᒃᑐᖅ ᒪᓕᙱᓚᖅ ᐊᑭᖃᙱᑦᑐᒥᒃ, ᓯᕗᕐᖓᒍᑦ, ᐊᒻᒪ ᑐᑭᓯᐅᒪᑦᑎᐊᖅᑐᒥᒃ ᐊᖏᕈᑎᒥᒃ.
ᑕᐃᒪᐃᓐᓂᖓᓄᑦ, ᓄᓇᕗᑦ ᒫᓐᓇ ᐅᖁᒪᐃᒃᓴᓕᖅᐳᖅ ᐊᐅᓚᑦᑎᓂᕐᒧᑦ ᐱᑐᖃᐅᔪᓂᒃ ᐅᖅᓱᐊᓗᖕᒧᑦ ᐊᐅᓚᐅᑎᓂᒃ ᐊᑭᑐᔪᐊᓘᓪᓗᑎᒃ ᐊᒻᒪ ᐊᒃᓱᕈᕐᓇᖅᖢᑎᒃ ᑲᒪᒋᔭᕆᐊᒃᓴᖅ. ᑕᒪᓐᓇ ᖃᒥᙶᕈᑕᐅᓕᖃᑦᑕᕐᒪᑦ ᖃᐅᒻᒪᖅᑯᑎᓄᑦ ᐊᒻᒪᓗ ᐱᐅᙱᓗᐊᕐᓂᖏᓐᓄᑦ, ᐊᑭᑐᔪᒻᒪᕆᐅᓪᓗᑎᒃ ᐆᒻᒪᖅᑯᑎᓄᑦ ᐊᑭᓕᕆᐊᓖᑦ, ᐊᒻᒪᓗ ᑕᑎᖃᕆᐊᖃᓕᖅᑐᑎᒃ ᑎᑭᑎᑕᐅᕙᑦᑐᓂᒃ ᐅᖅᓱᐊᓗᓐᓂᒃ ᓱᕈᐃᕙᑦᑐᓂᒃ ᐊᕙᑎᑦᑎᓐᓂᒃ.
ᐊᑐᖅᑕᐅᓂᖏᑦ ᐅᖅᓱᐊᓗᑐᐃᓐᓇᐃᑦ ᐆᒻᒪᖅᑯᑎᖃᕐᕖᑦ ᐱᕈᖅᐸᓪᓕᐊᑎᑦᑎᓯᒪᑐᐃᓐᓇᕆᐊᓖᑦ ᓄᓇᕘᒥ ᒫᓐᓇᐅᔪᖅ ᐃᓄᒋᐊᓐᓂᖏᓐᓄᑦ, ᐅᖅᓱᐊᓗᒃ ᐊᑭᑦᑐᐸᓪᓕᐊᑐᐃᓐᓇᕐᒪᑦ ᐊᒥᒐᖅᓯᕙᓪᓕᐊᑐᐃᓐᓇᖅᑐᓂᓗ. ᑕᑎᖃᐃᓐᓇᕐᓂᖅ ᐊᕝᕕᐊᕈᑎᐅᕗᖅ ᓄᓇᕗᑦᒥᐅᓄᑦ ᒪᑭᒪᑦᑎᐊᕈᓐᓇᖁᓪᓗᒋᑦ. ᓄᓇᕗᑦᒥ ᓄᑭᒃᓴᐅᑎᒃᑯᑦ ᑯᐊᐳᕇᓴᒃᑯᓐᓂ, ᐅᒃᐱᕈᓱᒃᑲᑦᑕ ᐅᑎᕆᐊᖃᕋᑦᑕ ᐱᒋᐊᕐᓂᕆᓚᐅᖅᑕᑎᓐᓄᑦ—ᐃᓄᐃᑦ ᓯᕗᒃᑲᖅᑕᖅᑎᒋᓪᓗᓂᐅᒃ ᓄᑖᙳᕆᐊᖅᑎᑕᐅᓯᒪᔪᖅ ᑕᑯᕙᒃᑕᕗᑦ ᖁᓪᓕᖅ, ᐊᒻᒪᓗ ᕿᓂᕐᓗᑕ ᐊᓯᐊᒎᕈᑕᐅᔪᓐᓇᖅᑐᓂᒃ ᐆᒻᒪᖅᑯᑎᓂᒃ ᖃᓂᒋᔭᑦᑎᓐᓂ. ᑕᐃᒪᓐᓇ ᓴᙱᓂᖃᖅᑎᑦᑎᕙᒃᐳᒍᑦ ᓯᕗᓂᒃᓴᑦᑎᓐᓂᒃ ᑭᖑᕚᒃᓴᑦᑎᓐᓄᑦ, ᓴᐳᔾᔨᑐᐃᓐᓇᖏᓪᓗᑕ, ᑭᓯᐊᓂᓕ ᓄᓇᒥᒃ ᐅᐱᒍᓱᒃᐳᒍᑦ.
ᐅᖅᓱᐊᓗᒃ ᓄᓇᓕᑦᑎᓐᓂ ᑭᓲᕙ ᐱᐊᙱᓐᓂᖓ ᐃᒐᓯᐅᑉ?
ᐅᖅᓱᐊᓗᒃ ᑐᕚᕆᔭᐅᔪᓐᓇᖅᑐᖅ ᐊᒻᒪᓗ ᐊᑑᑎᖃᑦᑎᐊᖅᑐᓂ ᐆᒻᒪᖅᑯᑎᓄᑦ, ᑕᐃᒪᐃᒻᒪᑦ ᓂᕈᐊᕈᑕᐅᑦᑎᐊᓚᐅᖅᑐᖅ ᐊᓯᐊᒎᕐᕕᒃᓴᖅᑕᖃᖅᑎᓐᓇᒍ. ᑭᓯᐊᓂᓕ, ᐊᖏᔪᓂᒃ ᐊᑦᑕᓇᖅᑐᖃᕐᒪᑦ ᐅᖅᓱᐊᓗᖕᒧᑦ ᐊᒃᑐᐃᓂᖃᖅᖢᓂᒃ ᐊᕙᑎᒥᒃ, ᑮᓇᐅᔭᑎᒍᑦ ᖃᓄᐃᓕᖓᓂᕆᔭᑦᑎᓐᓂᒃ, ᐊᒻᒪᓗ ᐃᓅᓯᕐᒧᑦ ᐃᓕᖅᑯᓯᕐᒧᓪᓗ ᖃᓄᐃᙱᑦᑎᐊᕐᓂᖏᓐᓄᑦ ᓄᓇᓕᕗᑦ.
- ᑕᐃᒪᙵᑦ ᐅᖅᓱᐊᓗᒃ ᐅᒥᐊᕐᔪᐊᒃᑯᑦ ᑎᑭᑎᑕᐅᕙᖕᒪᑦ ᓄᓇᕗᑦᒧᑦ, ᐅᖅᓱᐊᓗᒃ ᑯᕕᔪᖃᕈᓐᓇᕐᒪᑦ ᐃᒪᑦᑎᓐᓄᑦ, ᑕᒪᓐᓇᓗ ᐱᒻᒪᕆᐅᔪᒥᒃ ᓱᕋᐃᔪᓐᓇᕐᒪᑦ ᐆᒪᔪᓂᒃ ᐊᒻᒪᓗ ᐱᕈᖅᑐᓂᒃ ᑐᕚᖃᖅᖢᓂᒃ ᑖᒃᑯᓂᖓ.
- ᐃᑭᑦᑎᓂᖅ ᐅᖅᓱᐊᓗᖕᒥᒃ ᓴᖅᑭᑎᑦᑎᕙᒃᑭᕗᖅ ᓱᕈᕐᓇᖅᑐᒥᒃ ᓯᓚᒥᒃ ᓱᕈᐃᔪᒥᒃ ᓄᓇᒥᒃ, ᐃᒪᕐᒥᒃ, ᐱᕈᖅᑐᓂᒡᓗ ᐆᒪᔪᐃᑦ ᓄᓇᕗᑦᒥ ᑐᕚᕆᕙᒃᑕᖏᓐᓂᒃ.
- ᐅᖅᓱᐊᓗᒃ ᐊᑭᖓ ᐊᑭᑦᑐᖅᐸᓪᓕᐊᖏᓐᓇᖅᑐᖅ. ᑕᒪᓐᓇ ᐊᑭᑦᑐᕆᐊᕈᑕᐅᒐᔪᖃᑦᑕᕐᒪᑦ ᐆᒻᒪᖅᑯᑎᓄᑦ ᐊᑭᓕᖅᓱᕆᐊᓕᑦᑎᓐᓄᑦ ᓄᓇᕗᑦᒥ, ᑕᖅᑭᑕᒫᑦ ᐊᑐᖅᑐᒃᓴᖁᑎᑦᑎᓐᓂᑦ ᐅᓄᖅᓯᕙᓪᓕᐊᑐᐃᓐᓇᖅᖢᑎᒃ.
- ᓄᓇᕗᑦ ᒐᕙᒪᒃᑯᖏᑦ ᑮᓇᐅᔭᓂᒃ ᖁᓖᑦ ᒥᓕᐊᓐᓂᒃ ᐊᑐᖃᑦᑕᖅᐳᑦ ᐊᕐᕌᒍᑕᒫᑦ ᐃᑲᔫᑎᓂᒃ ᐅᖅᓱᐊᓗᑐᐃᓐᓇᕐᒧᑦ ᐆᒻᒪᖅᑯᑎᓕᐅᕐᓂᕐᒧᑦ. ᑖᒃᑯᐊ ᑮᓇᐅᔭᐃᑦ ᑐᕌᖓᖔᕈᓐᓇᖅᑐᑦ ᐊᓯᖏᓐᓄᑦ ᐱᒻᒪᕆᐅᔪᓄᑦ ᐱᑕᖃᕆᐊᖃᖅᑐᓄᑦ ᓄᓇᕗᑦᒥ, ᓲᕐᓗ ᐃᓕᓐᓂᐊᖅᑐᓕᕆᓂᕐᒧᑦ, ᐋᓐᓂᐊᖅᑐᓕᕆᓂᕐᒧᑦ, ᐅᕝᕙᓘᓐᓃᑦ ᓂᕿᖃᑦᑎᐊᕐᓂᕐᒧᑦ.
ᐳᔪᕐᓗᐃᑦ ᐃᑭᑦᑎᓂᕐᒥᑦ ᐅᖅᓱᐊᓗᖕᒥᑦ ᑳᓐᓱᑖᕈᑕᐅᔪᓐᓇᖅᐳᑦ—ᐊᓂᖅᓵᖅᑐᕐᓂᖅ ᑖᒃᑯᓂᖓ ᖃᐅᑕᒫᑦ ᐊᑦᑕᕐᓇᖅᑐᒦᑎᑦᑎᕗᖅ ᓇᖕᒥᓂᖅ ᐋᓐᓂᐊᖃᕐᓇᙱᑦᑐᓕᕆᓂᑦᑎᓐᓂᑦ. ᐊᓯᐊᒍᑦ ᖃᐅᒻᒪᖅᑯᑎᖃᕈᓐᓇᕐᒥᔪᒍᑦ ᓄᓇᕗᑦᒥ ᐊᑭᑭᓐᓂᖅᓴᒃᑯᑦ, ᐊᑦᑐᐃᓂᖃᖏᓐᓂᖅᓴᐅᓗᑎᓪᓗ ᐊᕙᑎᑦᑎᓐᓂᑦ, ᐃᑲᔪᖅᓱᐃᓗᑎᓪᓗ ᖃᓄᐃᙱᑦᑎᐊᖅᑐᓂᑦ ᓄᓇᓕᖕᓂᑦ. ᓄᓇᕗᑦ ᓄᑭᒃᓴᐅᑏᑦ ᑯᐊᐳᕇᓴᒃᑯᑦ ᕿᒥᕐᕈᖃᑦᑕᖅᑐᑦ ᑕᒪᐃᓐᓂᒃ ᓇᓖᕌᕈᑎᒃᓴᓂᒃ, ᐱᕙᓪᓕᐊᑎᑦᑎᓪᓗᑎᒡᓗ ᑕᐃᒃᑯᓂᖓ ᓂᕈᐊᖅᑕᐅᓯᒪᔪᓂᒃ ᓄᓇᕗᑦᒥᐅᓄᑦ ᓇᓗᓇᐃᖅᓯᓯᒪᖁᓪᓗᒋᑦ ᐃᑲᔫᑎᒃᓴᓂᒃ ᐅᓄᖅᑐᓄᑦ ᑭᖑᕚᒃᓴᑦᑎᓐᓄᑦ.
ᐆᒻᒪᖅᑯᑎᓕᕆᓂᖅ ᐅᓪᓗᒥ ᖃᓄᖅ ᐆᒻᒪᖅᑯᓯᐅᖅᐸᒃᐸᑦ ᓄᓇᕗᑦᒥ ᒫᓐᓇ?
ᓄᓇᕗᑦ 100%-ᒥᒃ ᑐᕚᖃᕐᓂᖅ ᐃᒐᓯᐅᑎᒥᒃ ᖃᐅᒻᒪᖅᑯᑎᖏᓐᓄᑦ. ᑭᓯᐊᓂᓕ ᐅᖅᓱᐊᓗᒃ ᓴᓇᔭᐅᕙᙱᓚᖅ ᓄᓇᕗᑦᒥ. ᖃᓄᕐᓕ ᑕᒪᓐᓇ ᐊᐅᓚᓂᖃᖅᐸ?
ᓯᕗᓪᓕᕐᒥ, ᐅᖅᓱᐊᓗᓕᕆᔨᒃᑯᑦ ᓄᓇᕗᑦ ᒐᕙᒪᒃᑯᖏᓐᓂ ᓂᐅᕕᖃᑦᑕᖅᐳᑦ ᐅᖅᓱᐊᓗᒃᓴᒥᒃ ᖃᓪᓗᓈᑦ ᓄᓇᖓᓐᓂᑦ ᓂᐅᕐᕈᑎᖃᕐᕕᐅᔪᓂᑦ, ᐊᑭᓕᖅᓱᐃᓪᓗᑎᒃ ᖃᓪᓗᓈᑦ ᓄᓇᖓᓐᓄᑦ ᐅᓯᔭᐅᖁᓪᓗᒍ ᓄᓇᕗᑦᒧᑦ, ᐊᒻᒪ ᓂᐅᕐᕈᑎᖃᓕᖅᖢᑎᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ. ᐅᖅᓱᐊᓗᒃ ᐅᖅᓱᐊᓗᖃᐅᑎᓃᑎᑕᐅᖃᑦᑕᖅᑐᖅ ᓄᓇᓕᓕᒫᓂ ᓄᓇᕗᑦᒥ. ᓱᓪᓗᓕᒃᑯᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐅᖅᓱᐊᓗᑐᐃᓐᓇᕐᒧᑦ ᐊᐅᓚᐅᑎᖏᓐᓄᑦ ᐃᑭᑦᑎᕙᑦᑐᑎᒃ ᐅᖅᓱᐊᓗᑐᐃᓐᓇᕐᒥᒃ ᐊᒻᒪᓗ ᐊᐅᓚᐅᑎᓄᑦ ᐆᒻᒪᖅᑯᑎᒥᒃ ᐆᒻᒪᖅᑯᑎᕈᖅᑎᑦᓯᕙᑦᑐᑎᒃ. ᑖᒃᑯᐊ ᐆᒻᒪᖅᑯᑏᑦ ᐊᐅᓪᓚᖅᑎᑕᐅᕙᑦᑐᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐅᖅᓱᐊᓗᑐᐃᓐᓇᕐᒧᑦ ᐊᐅᓚᐅᑎᖃᕐᕕᖏᓐᓂᑦ, ᐅᐊᔭᖏᑎᒍᑦ, ᐊᖏᕐᕋᓕᒫᓄᑦ ᐃᒡᓗᓄᑦ ᓄᓇᕗᑦᒥ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑲᒪᒋᔭᖃᖅᑐᑦ ᓄᓇᕗᑦᒥᐅᓂᒃ ᓄᓇᓕᓕᒫᓂ ᐊᑦᑕᓇᙱᑦᑐᒥᒃ, ᑕᑎᒋᔭᐅᔪᓐᓇᖅᑐᒥᒃ, ᐊᑭᑐᓗᐊᙱᑦᑐᒥᒃ ᐆᒻᒪᖅᑯᑎᖃᖅᑎᑦᑎᓂᕐᒥᒃ, 24/7. ᐃᒡᓗᓂᒃ ᓇᖕᒥᓂᖃᖅᑐᑦ, ᓇᖕᒥᓂᕆᔭᐅᔪᑦ, ᒐᕙᒪᒃᑯᓪᓗ ᐊᑭᓖᖃᑦᑕᖅᑐᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐆᒻᒪᖅᑯᑎᓄᑦ ᐊᑐᖃᑦᑕᖅᑕᖏᓐᓄᑦ. ᑮᓇᐅᔭᓕᐊᑦ ᓂᐅᕕᖅᐸᒃᑐᓄᑦ ᐊᑭᓕᖅᓱᐃᕙᒃᑐᑦ ᓇᑉᐸᓪᓗᐊᖏᓐᓂᒃ ᐆᒻᒪᖅᑯᑎᓄᑦ; ᐱᖃᑖ ᓇᑉᐸᖓ ᓄᓇᕗᑦ ᒐᕙᒪᒃᑯᑦ ᐃᑲᔫᓯᐊᖏᓐᓄᑦ.
ᓂᑯᕕᖃᑎᒌᖕᓂᖅ ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᒃᑯᑦ ᐊᔭᐅᖅᑐᐃᓂᕐᒧᑦ ᑎᑎᕋᖅᑕᐅᓯᒪᔪᖅ
ᓄᓇᕗᑦᒥ ᓄᒃᑭᒃᓴᐅᑎᒃᑯᑦ ᑯᐊᐳᕇᓴᖓ ᐊᒻᒪᓗ ᐊᖓᔪᖅᑳᕆᔭᐅᔪᑦ ᑲᒻᐸᓂᒋᔭᐅᔪᑦ, ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᔭᐅᖅᑐᐃᓯᒪᖕᒪᑕ ᐊᕐᕌᒍᒐᓴᐅᓕᖅᑐᓂᒃ ᓈᒻᒪᒃᑐᓂᒃ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓄᑦ ᐊᑐᐊᒐᓂᒃ ᐱᓕᕆᐊᒃᓴᓂᒡᓗ. ᑕᒪᒃᑯᐊ ᐋᖅᑭᒃᓯᒪᓪᓚᑦᑖᖅᑐᑦ ᑕᒪᒃᑯᐊ ᐃᓄᖕᓄᑦ ᓯᕗᒃᑲᖅᑕᖅᑕᐅᓪᓗᑎᒃ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᖃᕐᓂᕐᒧᑦ ᐱᓕᕆᐊᒃᓴᑦ ᓄᓇᕗᑦᒥ ᐊᔪᕐᓇᕈᓐᓃᕈᑕᐅᔪᓐᓇᖅᐳᑦ ᑲᔪᓯᑦᑎᐊᕈᓐᓇᖁᓪᓗᒋᓪᓗ.
ᕿᑭᖅᑖᓗᒃ ᑯᐊᐳᕇᓴᒃᑯᑦ ᓴᖅᑭᑦᑎᓚᐅᖅᑎᓪᓗᒋᑦ ᓄᓇᕗᑦᒥ ᓄᑭᒃᓴᐅᑎᒃᑯᑦ ᑯᐊᐳᕇᓴᒃᑯᓐᓂ ᐃᓘᓐᓇᖓᓄᑦ ᓇᖕᒥᓂᕆᔭᐅᓕᕐᓗᓂ ᑕᐅᑐᒐᖃᕐᓂᐊᕐᓗᓂ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓕᕆᓂᕐᒥᒃ, ᓇᓗᓇᕈᓐᓃᓚᐅᖅᑐᖅ ᐅᓄᖅᑐᐊᓗᖕᓂᒃ ᐊᒃᓱᕈᕐᓇᖅᑐᖃᓚᐅᕐᒪᑦ ᑲᔪᓯᓂᖃᑦᑎᐊᖅᑐᓂᒃ ᐃᓄᖕᓄᑦ ᓯᕗᓕᖅᑕᐅᓪᓗᑎᒃ ᐊᑐᒃᑲᓐᓂᕈᓐᓇᖅᑐᓄᑦ ᐆᒻᒪᖅᑯᑎᓄᑦ ᐱᓕᕆᐊᒃᓴᓄᑦ. ᐊᒃᓱᕈᕐᓇᕐᓂᖅᐹᖑᓚᐅᖅᑐᖅ ᒪᓕᒐᖅᑎᒍᑦ ᐊᖅᑯᑎᒃᓴᖃᙱᓐᓂᖅ.
2019-ᖑᑎᓪᓗᒍ, ᓄᓇᕗᑦ ᓄᑭᒃᓴᐅᑎᖏᑦ ᑯᐊᐳᕇᓴᒃᑯᑦ ᐅᖃᓪᓚᖃᑦᑕᓕᓚᐅᖅᑐᑦ ᐱᑕᖃᕆᐊᖃᕐᓂᖓᓂᒃ ᓈᒻᒪᒃᑐᓂᒃ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓄᑦ ᐊᑐᐊᒐᓂᒃ ᐱᓕᕆᐊᒃᓴᓂᒡᓗ ᓄᓇᕗᑦᒥ. ᐅᖃᖃᑎᖃᓚᐅᖅᑐᒍᑦ ᑎᒍᒥᐊᖅᑎᐅᔪᓂᒃ ᐊᒻᒪᓗ ᐱᔪᓐᓇᐅᑎᖃᖅᑐᓂᒃ ᑐᑭᓯᐅᒪᖁᓪᓗᑕ ᐋᖅᑭᒋᐊᕈᑎᒃᓴᓂᒃ ᐱᑕᖃᕆᐊᖃᖅᑐᓂᒃ ᐊᖅᑯᑎᒃᓴᒧᑦ ᑲᔪᓯᑦᑎᐊᕐᓂᕐᒧᑦ. ᓄᓇᕗᑦ ᓄᑭᒃᓴᐅᑏᑦ ᑯᐊᐳᕇᓴᖓᑦ ᓴᓂᓕᕇᒃᖢᑎᒃ ᐱᓕᕆᓚᐅᖅᑐᑦ ᐱᖃᑎᒥᓂᒃ. ᐊᕕᒃᑐᖅᓯᒪᔪᓂ ᐃᓄᐃᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᐅᔪᑦ ᐊᒻᒪᓗ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑭᕙᓪᓕᕐᒥ ᐊᒻᒪᓗ ᕿᑎᕐᒥᐅᓂ, ᐊᒻᒪᓗᑦᑕᐅᖅ ᓄᓇᕗᑦ ᑐᙵᕕᒃᑯᑦ ᑎᒥᖓ, ᑐᙵᕕᖃᖁᓪᓗᒋᑦ ᐃᓄᐃᑦ ᐱᔭᕆᐊᓕᖏᓐᓂᒃ ᑕᒪᑐᒧᖓ ᐅᖃᖃᑎᒌᖕᓂᕐᒧᑦ ᓄᓇᕗᑦ ᒐᕙᒪᒃᑯᖏᓐᓄᑦ. ᐊᔭᐅᖅᑐᐃᓂᕗᑦ ᑐᕌᒐᖃᓚᐅᖅᑐᖅ ᓄᓇᕗᑦᒥ ᐊᖏᕈᑏᑦ ᒪᓕᒃᑕᐅᖁᓪᓗᒋᑦ ᓄᓇᕗᑦᒥ ᐊᑐᒃᑲᓐᓂᕈᓐᓇᖅᑐᓄᑦ ᐆᒻᒪᖅᑯᑎᓄᑦ ᐊᑐᐊᒐᐃᑦ ᐱᓕᕆᐊᒃᓴᐃᓪᓗ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᒻᒪᓗ ᑎᒥᐅᔪᓄᑦ ᐆᒻᒪᖅᑯᑎᓕᐅᕐᓂᕐᒧᑦ ᐱᓕᕆᐊᖅ ᐊᑐᓕᖅᑎᑕᐅᓚᐅᖅᑐᖅ 2021-ᒥ ᐊᒻᒪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐃᒻᒥᒃᑰᖅᑐᑦ ᐆᒻᒪᖅᑯᑎᓕᐅᕐᓂᕐᒧᑦ ᐱᓕᕆᐊᖅ ᐊᑐᓕᖅᑎᑕᐅᓪᓚᕆᓚᐅᖅᑐᖅ 2023-ᒥ, ᐅᓄᖅᑐᑦ ᐃᓄᐃᑦ ᓯᕗᓕᖅᑎᐅᔪᑦ ᑕᖃᔪᐃᑦᑑᓪᓗᑎᒃ ᐱᓕᕆᖃᑦᑕᓚᐅᖅᑐᑦ ᑕᒪᒃᑯᐊ ᐱᓕᕆᐊᑦ ᒪᓕᖁᓪᓗᒋᑦ ᐊᑲᐅᓂᖅᐹᓂᒃ ᐃᓄᖕᓄᑦ. ᓄᓇᕗᑦ ᓄᒃᑭᒃᓴᐅᑎᖏᑦ ᑯᐊᐳᕇᓴᒃᑯᑦ ᐅᐱᒍᓱᒃᐳᑦ ᒥᑭᑦᑐᒥᒃ ᐱᓕᕆᖃᑕᐅᓚᐅᖅᐳᑦ ᑲᑐᔾᔨᖃᑎᒌᒃᖢᑎᒃ ᐱᓇᔪᒃᑕᐅᔪᓂᒃ. ᑐᑭᓯᒋᐊᒃᑲᓐᓂᕆᑦ ᐊᑖᓂ!
ᐱᓕᕆᐊᒃᓴᑦ ᐊᒻᒪ ᐃᑲᔪᖅᓱᐃᔾᔪᑏᑦ ᖃᓄᐃᑦᑐᓂᒃ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓂᒃ ᐱᑕᖃᖅᐸ ᓄᓇᕗᑦᒥ?
ᐊᕐᕌᒍᒐᓴᐅᓕᖅᑐᓂ, ᐊᑕᐅᓯᐅᖏᑦᑐᓂᒃ ᐊᑐᐊᒐᕐᓂᒃ ᐱᓕᕆᐊᒃᓴᓂᓪᓗ ᐋᖅᑭᒃᓯᓯᒪᓕᖅᑐᑦ ᓄᓇᕗᑦᒥᐅᓄᑦ ᐃᑲᔪᖅᓱᐃᔾᔪᑕᐅᓂᐊᖅᑐᓂᒃ ᐱᕈᖅᐸᓪᓕᐊᑎᑦᑎᓂᕐᒥᒃ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓂᒃ ᓄᓇᕗᑦᒥ, ᐃᑲᔫᑎᒃᓴᓂᒃ ᐃᒡᓗᕋᓛᖃᖅᑐᓄᑦ ᐋᖅᑭᒃᓯᓗᑎᒃ ᓯᕿᓂᕐᒥᒃ ᐊᑐᕈᓐᓇᖏᑦᑐᓂᒃ, ᐃᓄᖕᓄᑦ ᓇᖕᒥᓂᕆᔭᐅᔪᓄᑦ ᑲᒻᐸᓂᓄᑦ ᓄᓇᓕᖕᓄᑦ ᐱᓕᕆᐊᒃᓴᓂᒃ ᓴᓇᔪᓄᑦ.
ᓄᓇᕗᑦᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑎᑎᕋᕐᕕᖓ ᐊᑐᒃᑲᓐᓂᕈᓐᓇᖅᑐᓄᑦ ᐆᒻᒪᖅᑯᑎᓄᑦ ᐃᒡᓗᕋᓛᓄᑦ ᐃᑲᔫᑎᓄᑦ ᐱᓕᕆᐊᖅ
ᓄᓇᕗᑦ ᒐᕙᒪᒃᑯᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑎᑎᕋᕐᕕᖓ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓂᒃ ᐃᒡᓗᕋᓛᓂᒃ ᐃᑲᔫᑎᖃᖅᐳᑦ ᐃᑲᔫᑕᐅᕙᒃᑐᓂᒃ ᐱᔪᓐᓇᖅᑐᓂᒃ ᐃᒡᓗᕋᓛᖃᖅᑐᓂᒃ ᐊᑭᑭᓪᓕᒋᐊᖅᑎᑦᑎᔪᓐᓇᖁᓪᓗᒋᑦ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓂᒃ ᐃᒡᓗᕋᓛᒥᓄᑦ. ᐊᑕᐅᓯᐊᕐᓗᓂ, ᐅᑎᖅᑎᑕᐅᔪᓐᓇᖏᑦᑐᖅ ᑐᓂᕐᕈᓯᐊᖅ ᑎᑭᓪᓗᒍ $5,000 ᐊᑐᐃᓐᓇᐅᔪᖅ ᐊᑐᓂ ᐃᒡᓗᕋᓛᖃᖅᑐᓄᑦ. ᑕᑯᒋᐊᕐᓗᒍ ᓄᓇᕗᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑎᑎᕋᕐᕕᖓ ᐃᑭᐊᖅᑭᕕᖓ ᑐᑭᓯᒋᐊᒃᑲᓐᓂᕈᒪᒍᕕᑦ ᑖᔅᓱᒪ ᐱᓕᕆᐊᑉ ᒥᒃᓵᓄᑦ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑮᓇᐅᔭᓂᒃ ᓈᓴᐃᓂᕐᒧᑦ ᐱᓕᕆᐊᖓᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᓈᓴᐃᔾᔪᑎᓂᒃ ᐊᑐᕈᓐᓇᖅᑐᓂᒃ ᐊᖏᕐᕋᕆᔭᐅᔪᓂᒃ ᐊᒻᒪᓗ ᒪᕐᕉᖕᓂᒃ ᕼᐋᒻᓚᒃᑯᓐᓄᑦ ᑮᓇᐅᔭᒃᑯᕕᖃᖅᑐᑦ ᓇᖕᒥᓂᖅ ᐆᒻᒪᖅᑯᑎᓕᐅᕈᓐᓇᖁᓪᓗᒋᑦ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓂᒃ. ᐊᑐᖃᑦᑕᖅᑐᑦ ᐊᑎᓕᐅᖅᑕᐅᓯᒪᔪᑦ ᑕᒪᑐᒧᖓ ᐊᑭᓕᖅᑕᐅᖃᑦᑕᖅᑐᑦ ᐆᒻᒪᖅᑯᑎᓕᐅᓗᐊᕐᓂᖏᓐᓄᑦ ᐅᑎᖅᑎᑕᐅᓯᒪᔪᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐆᒻᒪᖅᑯᑎᓕᕆᔨᒃᑯᖏᓐᓄᑦ. ᑕᐃᒪᓐᓇ ᐊᑭᓕᖅᓱᐃᔨᑦ ᒥᒃᖠᒋᐊᖅᑎᑦᑎᔪᓐᓇᖅᐳᑦ ᐆᒻᒪᖅᑯᑎᓂᒃ ᓂᐅᕕᖅᑕᐅᕙᒃᑐᓂᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂᑦ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐃᑭᐊᖅᑭᕕᖓ ᑕᑯᒋᐊᕐᓗᒍ ᑐᑭᓯᒋᐊᒃᑲᓐᓂᕈᒪᒍᕕᑦ ᑖᔅᓱᒪ ᐱᓕᕆᐊᑉ ᒥᒃᓵᓄᑦ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᒻᒪ ᐱᓕᕆᕝᕕᐅᔪᓄᑦ ᐆᒻᒪᖅᑯᑎᓕᐅᕐᓂᕐᒧᑦ ᐱᓕᕆᐊᖅ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑮᓇᐅᔭᓕᐅᕋᓱᐊᖅᑎᓄᑦ ᐊᒻᒪ ᐱᓕᕆᕝᕕᖕᓄᑦ ᐆᒻᒪᖅᑯᑎᓕᐅᖅᑎᑦ ᐱᓕᕆᐊᖓ ᐱᔪᓐᓇᖅᑎᑦᑎᕗᖅ ᒫᓐᓇ ᓇᖕᒥᓂᖃᖅᑐᓄᑦ ᐊᑭᓕᖅᓱᐃᕙᒃᑐᓄᑦ (ᓇᖕᒥᓂᖁᑎᖃᖅᑐᓄᑦ) ᐊᒻᒪ ᐱᓕᕆᕝᕕᖕᓄᑦ ᐊᑭᓕᖅᓱᐃᕙᒃᑐᓄᑦ (ᕼᐋᒻᓚᒃᑯᑦ ᐊᒻᒪ ᒐᕙᒪᒃᑯᑦ ᐃᒡᓗᖁᑎᖏᑦ) ᐆᒻᒪᖅᑯᑎᓕᐅᕈᓐᓇᕐᓗᑎᒃ ᐊᑐᕐᓗᑎᒃ ᓄᑖᙳᕆᐊᖅᑎᑕᐅᔪᓐᓇᖅᑐᓂᒃ ᐆᒻᒪᖅᑯᑎᓂᒃ ᐊᒻᒪ ᓂᐅᕐᕈᑎᒋᓗᒋᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ. ᑕᑯᒋᐊᕐᓗᒍ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐃᑭᐊᖅᑭᕕᖓ ᑐᑭᓯᒋᐊᒃᑲᓐᓂᕈᒪᒍᕕᑦ ᑕᒪᑐᒪ ᒥᒃᓵᓄᑦ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐃᒻᒥᒃᑰᖅᑐᑦ ᐆᒻᒪᖅᑯᑎᓕᐅᖅᑎᑦ ᐱᓕᕆᐊᖓᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑮᓇᐅᔭᓕᐅᕋᓱᐊᖅᑎᓄᑦ ᐊᒻᒪ ᐱᓕᕆᕝᕕᖕᓄᑦ ᐆᒻᒪᖅᑯᑎᓕᐅᖅᑎᑦ ᐱᓕᕆᐊᖓ ᐱᔪᓐᓇᖅᑎᑦᑎᕗᖅ ᒫᓐᓇ ᓇᖕᒥᓂᖃᖅᑐᓄᑦ ᐊᑭᓕᖅᓱᐃᕙᒃᑐᓄᑦ (ᓇᖕᒥᓂᖁᑎᖃᖅᑐᓄᑦ) ᐊᒻᒪ ᐱᓕᕆᕝᕕᖕᓄᑦ ᐊᑭᓕᖅᓱᐃᕙᒃᑐᓄᑦ (ᕼᐋᒻᓚᒃᑯᑦ ᐊᒻᒪ ᒐᕙᒪᒃᑯᑦ ᐃᒡᓗᖁᑎᖏᑦ) ᐆᒻᒪᖅᑯᑎᓕᐅᕈᓐᓇᕐᓗᑎᒃ ᐊᑐᕐᓗᑎᒃ ᓄᑖᙳᕆᐊᖅᑎᑕᐅᔪᓐᓇᖅᑐᓂᒃ ᐆᒻᒪᖅᑯᑎᓂᒃ ᐊᒻᒪ ᓂᐅᕐᕈᑎᒋᓗᒋᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ. ᑕᑯᒋᐊᕐᓗᒍ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐃᑭᐊᖅᑭᕕᖓ ᑐᑭᓯᒋᐊᒃᑲᓐᓂᕈᒪᒍᕕᑦ ᑕᒪᑐᒪ ᒥᒃᓵᓄᑦ.
ᓯᕗᒧᑦ ᑕᑯᓐᓇᕐᓂᖅ ᖃᓄᖅ ᑕᐅᑐᙳᐊᖅᑕᐅᕙᒃ ᐆᒻᒪᖅᑯᑎᓕᕆᓂᕐᒧᑦ ᓯᕗᓂᒃᓴᑦᑎᓂᒃ?
ᒪᓕᒐᐃᑦ ᐃᓄᒃᑎᑐᑦ ᑐᑭᓕᒃ “ᐃᓅᓯᖃᑦᓯᐊᕐᓗᓂ”, ᑕᒪᓐᓇ ᓇᓗᓇᐃᖅᑕᐅᓯᒪᔪᖅ ᐃᓄᐃᑦ ᐃᓕᖅᑯᓯᖓᖐᓐᓂᖅ ᐱᔾᔪᑎᖓ.
ᒪᓕᒐᐃᑦ ᑐᙵᕕᒋᔭᐅᔪᖅ ᑐᑭᒧᐊᑦᑎᑕᐅᓪᓗᓂ ᐃᓄᐃᑦ ᐃᓐᓇᑐᖃᖏᓐᓄᑦ ᐃᓅᖃᑎᒌᖕᓂᕐᒧᑦ ᐱᒻᒪᕆᐅᑎᑕᖏᓐᓄᑦ ᓴᕿᑦᑎᔾᔪᑕᐅᕙᑦᑐᓄᑦ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ. ᑕᒪᕐᒥᒃ ᒪᓕᒐᐃᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ ᑐᙵᕕᓪᓗᐊᑕᐅᖕᒪᑕ ᓄᓇᕗᑦ ᓄᑭᒃᓴᐅᑏᑦ ᑯᐊᐳᕇᓴᖓᑕ ᐱᕙᓪᓕᐊᔾᔪᑎᒃᓴᖏᓐᓂᒃ ᐊᒻᒪᓗ ᓴᓗᒪᔪᒥᒃ ᐆᒻᒪᖅᑯᑎᖃᕐᓂᕐᒧᑦ ᓅᑉᐸᓪᓕᐊᓂᕐᒥᒃ ᑕᒪᐃᓐᓂᒃ.
ᓯᕗᓂᒃᓴᒧᑦ ᑕᐅᑐᒃᑕᕗᑦ ᐆᒻᒪᖅᑯᑎᓕᕆᓂᖅ ᓄᓇᕗᑦᒥ, ᐊᑐᓕᖅᑎᑦᑎᓇᓱᖃᑦᑕᖅᑐᒍᑦ ᐆᒻᒪᖅᑯᑎᓕᕆᓂᕐᒧᑦ ᐋᖅᑭᒍᑎᒃᓴᓂᒃ ᒪᓕᒃᖢᓂᒃ ᒪᓕᒐᐃᑦ, ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᓄᓇᓖᑦ ᓯᕗᓪᓕᐅᔾᔭᐅᖁᔭᖏᓐᓂᒃ.
ᑎᓴᒪᐅᕗᑦ ᒪᓕᒐᖏᑦ ᒪᓕᒐᐃᑦ:
1. ᐱᓕᕆᓂᖅ ᐃᓄᓕᒫᓄᑦ ᐱᐅᓂᖏᓐᓄᑦ
ᐅᖅᓱᐊᓗᒃ ᐊᑦᑕᓇᕈᑕᐅᕙᖕᒪᑦ ᐊᕙᑎᒧᑦ, ᐃᓄᖕᓄᑦ ᓂᕐᔪᑎᓄᒡᓗ, ᐊᒻᒪᓗ ᑲᑐᔾᔨᓪᓗᑕ ᑮᓇᐅᔭᖁᑎᑦᑎᓐᓄᑦ ᐊᒃᑐᐃᕙᑦᑐᓂ ᓄᓇᓕᖕᓂᑦ ᓄᓇᕗᑦᒥ. ᓴᓗᒪᓂᖅᓴᒧᑦ ᐊᑭᑐᓗᐊᙱᑦᑐᒧᑦ ᓅᑉᐸᓪᓕᐊᓂᖅ ᐃᑲᔫᑎᖃᕐᓂᐊᖅᑐᖅ ᓄᓇᕗᑦᒥᐅᓕᒫᓄᑦ ᐊᒻᒪᓗ ᑕᒪᐃᓐᓄᑦ ᐱᕚᓪᓕᕈᑎᖃᕐᓂᐊᖅᑐᖅ.
ᓂᕐᔪᑎᓕᒫᑦ ᑐᕚᖃᖅᐳᑦ ᓴᓗᒪᔪᒥᒃ ᐊᓂᖅᓵᖅᑐᕐᓂᕐᒥᒃ, ᐃᒪᕐᒥᒃ, ᓄᓇᒥᒡᓗ. ᒪᓕᒃᖢᒋᑦ ᐅᖅᓱᐊᓗᐃᑦ ᐊᑦᑕᓇᕐᓂᖏᑦ ᐱᖓᓱᑦ, ᐳᔪᖓᒍᑦ ᐃᑭᑦᑎᓂᒃᑯᑦ, ᐊᒻᒪᓗ ᑯᕕᔪᖃᕐᓂᕌᖓᑦ ᓴᖅᑭᑦᑐᓐᓇᖅᑐᑦ ᐅᒥᐊᕐᔪᐊᒃᑰᖅᑎᑕᐅᑎᓪᓗᒋᑦ ᐊᒻᒪᓗ ᑐᖅᑯᖅᑕᐅᑎᓪᓗᒋᑦ. ᓴᓗᒪᓂᖅᓴᒧᑦ ᐆᒻᒪᖅᑯᑎᒧᑦ ᓅᑉᐸᓪᓕᐊᓂᖅ ᑕᑯᒃᓴᐅᑎᑦᑎᕗᖅ ᐃᒃᐱᒍᓱᑦᑎᐊᕐᓂᕐᒥᒃ ᐆᒪᔪᓕᒫᓂᒃ.
3. ᑲᔪᓯᑎᑦᑎᓂᖅ ᐋᖅᑭᐅᒪᓂᕐᒥᒃ ᐊᔾᔨᒌᒃᑎᑦᑎᓂᕐᒥᒡᓗ
ᒥᒃᖠᒋᐊᖅᑎᑦᑎᓂᖅ ᐳᔪᕐᓗᖕᓂᒃ ᐊᓂᐊᕙᓪᓕᐊᔪᓂᒃ (ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓱᕋᐃᕙᒃᑐᓂᒃ ᐊᒻᒪᓗ ᓱᕋᐃᕙᒃᑐᓂᒃ ᓯᓚᐅᑉ ᖃᓄᐃᓐᓂᖏᓐᓂᒃ) ᓴᖅᑭᑦᑎᒃᑲᓐᓂᖅᐳᖅ ᐋᖅᑭᒃᓯᒪᑦᑎᐊᕐᓂᕐᒥᒃ ᐊᒻᒪᓗ ᐊᔾᔨᒌᒃᑎᑦᑎᓂᕐᒥᒃ ᓯᓚᕐᔪᐊᑉ ᐃᓗᐊᓂ. ᐃᓄᐃᑦ-ᓇᖕᒥᓂᖃᕐᓂᖅ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓂᒃ ᐱᖁᑎᕐᔪᐊᓂᒃ ᐱᕚᓪᓕᕈᑕᐅᒻᒥᔪᖅ ᑮᓇᐅᔭᓕᐅᕈᑎᖃᕋᓱᐊᕐᓂᕐᒧᑦ ᓇᓕᒧᒌᓕᖅᑎᑦᓯᓂᕐᒥᒃ ᓄᓇᕗᑦ ᐃᓗᐊᓂ.
4. ᑲᔪᓯᔪᒃᑯᑦ ᐸᕐᓇᐃᓂᖅ ᐊᒻᒪ ᐸᕐᓇᐃᓂᖅ ᓯᕗᓂᒃᓴᒧᑦ
ᒫᓐᓇ ᓴᓗᒪᓂᖅᓴᒧᑦ ᐊᑭᑐᓗᐊᙱᑦᑐᒧᑦ ᐆᒻᒪᖅᑯᑎᖃᕐᓂᕐᒧᑦ ᐋᖅᑭᑦᓱᐃᕗᖅ ᓯᕗᓂᒃᓴᑎᓐᓂ ᑭᖑᕚᕆᓂᐊᖅᑕᑎᓐᓄᑦ ᓄᓇᕗᑦᒥᐅᓄᑦ ᑲᔪᓯᑦᑎᐊᖁᓪᓗᒋᑦ, ᐃᓄᐃᑦ ᓇᖕᒥᓂᖁᑎᖃᖁᓪᓗᒋᑦ, ᐊᖏᓂᖅᐹᒥᓪᓗ ᐃᑲᔫᑎᖃᖁᓪᓗᒋᑦ.
ᐱᓕᕆᖃᑎᖃᕐᓂᖅ ᒐᕙᒪᒃᑯᓐᓂᑦ ᐆᒻᒪᖅᑯᑎᓄᑦ ᓄᒃᑎᕆᓂᖅ ᐃᑲᔪᖅᑐᖅᑕᐅᕙ ᒐᕙᒪᒃᑯᓐᓄᑦ?
ᓇᐃᑦᑐᖅ ᑭᐅᔾᔪᑎ: ᐄ! ᐅᖃᓕᒫᒃᑲᓐᓂᕆᑦ ᐊᑖᓂ ᖃᓄᖅ ᐊᔾᔨᒌᙱᑦᑐᑦ ᒐᕙᒪᒃᑯᑦ ᐃᓚᓕᐅᔾᔨᓯᒪᖕᒪᖔᑕ ᐆᒻᒪᖅᑯᑎᓂᒃ ᐱᕙᓪᓕᐊᑎᑦᑎᓂᕐᒥᒃ ᐸᕐᓇᐅᑎᒥᖕᓂᒃ
ᓄᓇᕗᑦ ᐅᑭᐅᖅᑕᖅᑐᒥ ᓇᖕᒥᓂᖃᕐᓂᕐᒧᑦ ᐅᐊᑦᓯᔨᐅᓂᕐᒧᓪᓗ ᐅᐸᓗᖓᐃᔭᐅᑎ
ᓄᓇᕗᑦ ᑐᙵᕕᒃᑯᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᑲᑐᔾᔨᓪᓗᑎᒃ ᐋᖅᑭᒃᓱᐃᓚᐅᖅᑐᑦ ᓄᓇᕗᑦ ᐅᑭᐅᖅᑕᖅᑐᒥᑦ ᑲᓇᑕᒥᐅᑕᐅᓂᖓ ᐊᒻᒪ ᐊᑦᑕᕐᓇᖅᑐᒦᑎᑕᐃᓕᓂᖅ ᑲᑎᒪᓂᖅ ᐅᐸᓗᖓᐃᔭᐅᑎᓂᒃ 2025-ᒥ, ᑖᒃᑯᐊ ᑲᑎᑎᑦᑎᔪᑦ ᑕᒪᐃᓐᓂᒃ ᑕᐅᑐᙳᐊᖅᑕᖏᓐᓂᒃ ᓄᓇᕗᑦ ᓯᕗᓂᒃᓴᒥ ᐊᑦᑕᓇᔾᔭᐃᖅᓯᒪᓂᕐᒧᑦ, ᑐᙵᕕᖃᖅᖢᑎᒃ ᐅᒃᐱᕆᔭᖏᓐᓂᒃ ᐊᒻᒪᓗ ᓯᕗᓪᓕᐅᔾᔭᐅᖁᔭᖏᓐᓂᒃ ᐃᓄᐃᑦ. ᐅᐸᓗᖓᐃᔭᐅᑎ ᓇᓗᓇᐃᔭᐃᔪᖅ ᑐᙵᕕᓪᓗᐊᑕᐅᓂᖓᓂᒃ ᐃᓄᐃᑦ ᑐᑭᑖᖅᑎᑦᓯᓂᕐᒥᒃ ᑲᓇᑕᐅᑉ ᐅᑭᐅᖅᑕᖅᑐᒥ ᐱᓇᓱᐊᖅᑕᖓᓂᒃ ᐊᒻᒪᓗ ᓇᓗᓇᐃᖅᓯᓪᓗᓂ ᐅᑭᐅᖅᑕᖅᑐᒥ ᐊᑦᑕᓇᔾᔭᐃᖅᓯᒪᓂᖅ ᐱᔭᐅᔪᓐᓇᖏᒻᒪᑦ ᐃᓄᐃᑦ ᓇᖕᒥᓂᖁᑎᖃᓐᖏᑉᐸᑕ.
ᐱᓕᕆᐊᒃᓴᕐᔪᐊᑦ, ᐱᖃᓯᐅᑎᓪᓗᒍ ᐃᖃᓗᖕᓂ ᓄᒃᑭᒃᓴᐅᑏᑦ ᐱᓕᕆᐊᖅ, ᓇᓗᓇᐃᖅᑕᐅᓯᒪᔪᑦ ᐱᑕᖃᕆᐊᖃᓪᓚᕆᒃᑐᑦ ᐱᖁᑎᕐᔪᐊᑦ ᐃᓗᐊᓂ ᐅᐸᓗᖓᐃᔭᐅᑎᐅᑉ ᓯᕗᒧᐊᒋᐊᖁᓪᓗᒍ ᐃᓄᐃᑦ ᓇᒻᒥᓂᖃᕐᓂᖅ ᐊᒻᒪᓗ ᓄᓇᕗᑦ ᐅᑭᐅᖅᑕᖅᑐᒥᑦ ᑲᓇᑕᒥᐅᑕᐅᓂᖓ ᐊᒻᒪ ᐊᑦᑕᕐᓇᖅᑐᒦᑎᑕᐃᓕᓂᖅ ᑲᑎᒪᓂᖅ. ᐃᑲᔪᖅᓱᐃᓂᐊᕐᓗᓂ ᐊᑕᐅᓯᕐᒥ ᓱᒃᑲᓛᖑᔪᒥ ᐃᓄᒋᐊᒃᓯᕙᓪᓕᐊᔪᒥ ᑲᓇᑕᒥ, ᓄᓇᕗᑦᒥᐅᑦ ᐊᑐᐃᓐᓇᖃᕆᐊᖃᖅᐳᑦ ᐊᑭᑐᓗᐊᙱᑦᑐᒥ ᐊᑐᐃᓐᓇᐅᔪᓐᓇᖅᑐᒥᓗ ᐆᒻᒪᖅᑯᑎᓂᑦ. ᐊᑭᒃᖠᕚᓪᓕᕈᑕᐅᓛᕐᐳᖅ ᐃᓅᓇᓱᐊᕐᓂᕐᒧᑦ ᐊᑭᐅᔪᓂᑦ ᐅᑭᐅᖅᑕᖅᑐᒥ ᐊᒻᒪ ᐱᕕᖃᖅᑎᑦᑎᓗᓂ ᓄᓇᕗᑦᒥᐅᓂᑦ ᑕᐅᑐᒐᖃᕐᓂᕐᒥᑦ ᐱᒻᒪᕆᐅᓂᐅᔪᓂᑦ ᐆᒻᒪᖅᑯᑎᓄᑦ ᐊᑭᓕᖅᓱᕆᐊᓕᓐᓂᑦ ᑕᐅᑐᙱᖔᕐᖢᑎᒃ. ᓄᓇᕗᑦ ᓯᕗᓂᒃᓴᖓ ᖃᐅᒪᑦᑎᐊᕐᑐᖅ ᓯᕗᓪᓕᐅᔾᔨᒍᑦᑕ ᐱᖁᑎᕐᔪᐊᓂᒃ ᒪᑭᒪᑦᑎᐊᖁᓪᓗᒍ ᓄᓇᕗᑦ.
ᑲᓇᑕᓕᒫᒥ ᐃᓄᐃᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐸᕐᓇᐅᑎ
ᐃᓄᐃᑦ ᑕᐱᕇᑦ ᑲᓇᑕᒥ ᓴᕿᑎᑦᓯᓚᐅᕐᑐᑦ ᑲᓇᑕᓕᒫᒥ ᐃᓄᐃᑦ ᓯᓚᐅᑉ ᐊᓯᔾᔨᕐᐸᓪᓕᐊᓂᐊᓄᑦ ᐸᕐᓇᐅᑎᒥᒃ 2019-ᒥ ᑐᕌᒐᖃᕐᖢᑎᒃ ᓴᙱᓕᕐᑎᑦᓯᓂᕐᒥᒃ ᒪᑭᒪᑦᑎᐊᕈᓐᓇᓂᕐᒥᒃ ᒪᑭᑕᑦᑎᐊᕈᓐᓇᓂᕐᒥᓪᓗ ᑕᒪᐃᓐᓂᒃ ᐃᓄᐃᑦ ᓄᓇᖓᑦ ᓵᙵᑎᓪᓗᒋᑦ ᓱᑲᔪᒥᒃ ᐊᓯᔾᔨᕐᐸᓪᓕᐊᔪᒥᒃ ᓯᓚᒥᒃ ᓄᓇᒥᓪᓗ. ᐱᔾᔪᑎᒋᔭᖓ ᐸᕐᓇᐅᑏᑦ ᐱᔾᔪᑖ ᑐᙵᕕᓪᓗᐊᑕᖏᓐᓂᒃ, ᐃᓄᐃᑦ ᐋᖅᑭᑦᓯᒪᔭᖏᓐᓂᒃ ᖃᓄᐃᓕᐅᕈᑕᐅᓂᐊᖅᑐᓂᒃ ᓴᐳᒻᒥᔭᐅᖁᓪᓗᒋᑦ ᐃᓄᐃᑦ ᐃᓕᖅᑯᓯᖏᑦ, ᐅᖃᐅᓯᖏᑦ ᐃᓅᓯᖏᓪᓗ.
ᑕᓪᓕᒪᑦ ᓯᕗᓪᓕᐅᔾᔭᐅᖁᔭᐅᔪᑦ ᐅᑯᐊᖑᕗᑦ:
- ᖃᐅᔨᒪᓂᖃᑦᑎᐊᕐᑐᖅ ᐊᒻᒪᓗ ᐱᔪᓐᓇᕐᓂᖅᑖᖅᐸᓪᓕᐊᓂᖅ
- ᐋᓐᓂᐊᖃᕐᓇᙱᑦᑐᓕᕆᓂᖅ, ᖃᓄᐃᙱᑦᑎᐊᕐᓂᖅ, ᐊᒻᒪᓗ ᐊᕙᑎᓕᕆᓂᖅ
- ᓂᕿᓕᕆᔾᔪᑏᑦ
- ᒪᑭᒪᔾᔪᑏᑦ
- ᐆᒻᒪᖅᑯᑎᓕᕆᓂᖅ
ᐊᕕᒃᑐᖅᓯᒪᔪᓂ ᐊᒻᒪ ᓄᓇᓕᖕᓂ ᐊᐅᓚᑕᐅᔪᑦ ᐆᒻᒪᖅᑯᑎᓄᑦ ᐋᖅᑭᒍᑎᒃᓴᑦ ᐃᓄᐃᑦ ᐆᒻᒪᖅᑯᑎᖏᓐᓄᑦ ᐃᒻᒥᒃᑰᕈᓐᓇᕐᓂᕐᒧᑦ ᓇᓗᓇᐃᖅᑕᐅᓯᒪᓪᓚᕆᒃᑐᑦ. ᐱᓕᕆᐊᒃᓴᐃᑦ ᓄᓇᕗᑦᒥ ᓇᖕᒥᓂᖃᖅᑐᓄᑦ ᑲᑐᔾᔨᖃᑎᒌᑦ ᐋᖅᑭᒃᓱᐃᕙᒃᑐᑦ ᒪᓕᒃᐳᑦ ᑖᒃᑯᓂᖓ ᐊᒃᑐᐊᓂᖃᖅᑐᓂᒃ ᓯᕗᓪᓕᐅᔾᔨᔭᕆᐊᖃᖅᑐᓂᒃ. ᑕᑯᒃᓴᐅᑎᑦᑎᕗᑦ ᐱᐅᔪᒥᒃ ᐊᓯᔾᔨᕐᓂᐅᔪᒥᒃ ᑎᑭᑕᐅᔪᓐᓇᖅᑐᒥᒃ ᐱᔪᓐᓇᐅᑎᖃᖅᑐᑦ ᐊᒻᒪᓗ ᑎᒍᒥᐊᖅᑎᐅᔪᑦ ᐱᓕᕆᖃᑎᒌᒃᐸᑕ ᐳᔪᕐᓗᖃᓗᐊᙱᑦᑐᒥᒃ ᑮᓇᐅᔭᓕᐅᕈᑎᖃᕋᓱᐊᕐᓂᕐᒧᑦ ᐱᖃᓯᐅᔾᔨᔪᒥᒃ ᓯᓚᑖᓃᑦᑐᓂᒃ ᐃᓄᐃᑦ ᓄᓇᓕᖏᓐᓂᒃ.
ᒐᕙᒪᑐᖃᒃᑯᑦ ᑐᕌᒐᖃᖅᐳᑦ ᐲᔭᐃᓂᕐᒥᒃ ᐳᔪᕐᓗᖕᓂᒃ ᐸᕐᓇᐅᑎᖓᑦ
ᑲᓇᑕᐅᑉ ᒐᕙᒪᒃᑯᖏᑦ ᐃᓕᓴᖅᓯᓯᒪᖕᒪᑕ ᐳᔪᕐᓗᐃᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓱᕈᕐᓇᖅᑐᑦ ᐊᕙᑎᑦᑎᓐᓄᑦ ᐊᒻᒪᓗ ᖃᓄᖅᑑᕈᑕᐅᔭᕆᐊᖃᖅᑐᑦ ᑕᒪᒃᑯᐊ ᓱᕈᕐᓇᖅᑐᑦ ᒥᒃᖠᕚᓪᓕᖁᓪᓗᒋᑦ. ᐊᑐᓕᖅᑎᑦᑎᓯᒪᓕᖅᑐᑦ ᐊᑕᐅᓯᐅᙱᑦᑐᓂᒃ ᐸᕐᓇᐅᑎᓂᒃ ᒪᓕᒐᕐᓂᓪᓗ ᑲᔪᖏᖅᓴᐃᔾᔪᑕᐅᓂᐊᖅᑐᓂᒃ ᐳᔪᕐᓗᐃᑦ ᒥᒃᖠᕚᓪᓕᖅᑎᑕᐅᖁᓪᓗᒋᑦ ᑲᓇᑕᓕᒫᒥ.
ᑖᒃᑯᐊ ᒐᕙᒪᑐᖃᒃᑯᑦ ᑐᕌᒐᖃᖅᐳᑦ ᐲᔭᐃᓂᕐᒥᒃ ᐳᔪᕐᓗᖕᓂᒃ ᐸᕐᓇᐅᑎᖓᑦ ᐱᖁᔭᕐᔪᐊᖅ ᐊᖏᕈᑎᖃᖅᓯᒪᔪᖅ ᒐᕙᒪᑐᖃᒃᑯᓐᓂᑦ ᐳᔪᕐᓗᖃᕈᓐᓃᐹᓪᓕᖁᓪᓗᒋᑦ 2050-ᖑᓕᖅᐸᑦ ᑖᓐᓇ ᒪᓕᒐᖅ ᓴᖅᑭᔮᑦᑎᐊᖁᓪᓗᒍ ᓵᑕᒃᓴᐅᓂᖅ ᐊᒻᒪ ᑲᒪᒋᔪᓐᓇᖁᓪᓗᒋᓪᓗ ᒐᕙᒪᒃᑯᑦ ᑐᕌᒐᕆᔭᒥᓂᒃ ᓴᖅᑭᑦᑎᓇᓱᒃᑎᓪᓗᒋᑦ.
ᒐᕙᒪᑐᖃᒃᑯᑦ ᐋᖅᑭᒃᓯᓯᒪᖕᒥᔪᑦ ᐃᒪᓐᓇ:
- ᓴᙱᒃᑎᒋᐊᖅᓯᒪᔪᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐸᕐᓇᐅᑎ,
- ᑲᓇᑕᓕᒫᒥ ᐋᖅᑭᒃᓯᒪᓂᐅᔪᖅ, ᐊᒻᒪᓗ
- 2030-ᒥ ᐳᔪᕐᓗᖕᒥᒃ ᒥᒃᖠᒋᐊᖅᑎᑦᑎᓂᕐᒧᑦ ᐸᕐᓇᐅᑎ
ᑕᒪᕐᒥᒃ ᒪᓕᒃᐳᑦ ᑐᓴᖅᑕᐅᔪᓂᒃ ᐊᕕᒃᑐᖅᓯᒪᔪᓂ, ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ, ᓄᓇᖃᖅᑳᖅᓯᒪᔪᓂ, ᓄᖑᑉᐸᓪᓕᐊᔪᓂᒃ ᐅᖃᐅᔾᔨᒋᐊᖅᑎᓂᒃ ᑎᒥᐅᔪᓂᒃ, ᐊᒻᒪᓗ ᑭᒃᑯᑐᐃᓐᓇᕐᓂᒃ ᑭᓱᓂᒃ ᐱᑕᖃᕆᐊᖃᕐᒪᖔᑦ ᒥᒃᖠᒋᐊᖅᑎᑦᑎᓇᓱᖕᓂᕐᒧᑦ ᐳᔪᕐᓗᖕᓂᒃ ᑲᓇᑕᒥ 40-45%ᒥᒃ 2005-ᒥ 2030-ᒥ.
ᓴᓇᕕᐅᔪᑦ ᑭᒡᒐᖅᑐᐃᒐᓗᐊᖅᑎᓪᓗᒋᑦ ᐊᖏᔪᒥᒃ ᐳᔪᕐᓗᖕᒥᒃ ᑲᓇᑕᒥ, ᐆᒻᒪᖅᑯᓯᐅᕐᓂᖅ ᓱᓕ ᐃᑲᔪᕐᓂᖃᖅᐳᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐳᔪᕐᓗᖕᒥᒃ ᐃᓚᖏᓐᓂᑦ ᓄᓇᓕᐅᔪᓂᑦ. ᓄᓇᕗᑦ 100%-ᒥᒃ ᑐᕚᖃᕐᒪᑦ ᐅᖅᓱᐊᓗᑐᐃᓐᓇᕐᒥᒃ ᐆᒻᒪᖅᑯᓯᐅᕐᓂᕐᒧᑦ, ᐳᔪᕐᓗᒃ ᐆᒻᒪᖅᑯᑎᓄᑦ ᓱᓕ ᖁᑦᑎᓂᖅᐹᖑᖃᑕᐅᕗᖅ ᑲᓇᑕᒥ. ᓴᓗᒪᔪᒥᒃ ᐆᒻᒪᖅᑯᑎᖃᕐᓂᕐᒧᑦ ᓅᑉᐸᓪᓕᐊᓂᖅ ᓄᓇᕗᑦᒥ ᒪᓕᒃᓯᒪᕗᖅ ᑲᓇᑕᐅᑉ ᑐᕌᒐᖏᓐᓂᒃ ᒥᒃᖠᒋᐊᖅᑎᑦᑎᓇᓱᐊᕐᓂᕐᒧᑦ ᐃᓯᐊᕿᓂᕆᔭᑦᑎᓐᓂᒃ, ᒥᒃᖠᒋᐊᖅᑎᑦᑎᓇᓱᐊᕐᓂᕐᒧᑦ ᓱᕈᕐᓇᖅᑐᓂᒃ ᐊᕙᑎᒥᒃ, ᐊᒻᒪᓗ ᒥᒃᖠᒋᐊᖅᑎᑦᑎᓇᓱᐊᕐᓂᕐᒧᑦ ᐊᒃᑐᐃᓂᐅᔪᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐃᒃᐱᒋᔭᐅᓂᖅᓴᐅᕙᒃᑐᓂᒃ ᐅᑭᐅᖅᑕᖅᑐᒥ ᖃᓪᓗᓈᑦ ᓄᓇᖓᓐᓂᑦ.
ᑐᑭᒧᐊᒍᑏᑦ ᒪᓕᒐᐃᑦ ᓇᓕᐊᒃ ᒪᓕᒐᐃᑦ ᐊᑐᖅᐸᑦ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓂᒃ ᐱᕙᓪᓕᐊᑎᑦᑎᓂᕐᒧᑦ ᓄᓇᕗᒻᒥ?
ᓄᓇᕗᑦᒥ ᓄᓇᑖᕐᓂᕐᒧᑦ ᐊᖏᕈᑏᑦ
ᓄᓇᕗᑦᒥ ᓄᓇᑖᕐᓂᕐᒧᑦ ᐊᖏᕈᑏᑦ (NLCA ᐅᕝᕙᓘᓐᓃᑦ ᓄᓇᕗᑦᒥ ᐊᖏᕈᑏᑦ) ᑳᓐᑐᕌᖑᕗᖅ ᐃᓄᖕᓄᑦ ᓄᓇᕗᑦᒥ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓇᓗᓇᐃᔭᐃᓯᒪᔪᖅ ᐱᔪᓐᓇᐅᑎᖏᓐᓂᒃ ᐱᕚᓪᓕᕈᑎᔅᓴᖏᓐᓂᒡᓗ ᐃᓄᐃᑦ ᓄᓇᕗᑦᒥ. ᓄᓇᕗᑦ ᐊᖏᕈᑎᖓ ᓇᓗᓇᐃᖅᓯᔪᖅ ᐱᔪᓐᓇᐅᑎᖏᓐᓂᒃ ᐃᓄᐃᑦ ᓄᓇᑖᖃᑕᐅᓯᒪᔪᑦ ᐃᓗᐊᓂ ᓄᓇᕗᑦ ᓄᓇᑖᕐᕕᖓᑕ (ᓄᓇᕗᑦ ᐊᕕᒃᑐᖅᓯᒪᓂᖓᑕ) ᐱᖃᓯᐅᑎᓗᒋᑦ ᐱᔪᓐᓇᐅᑎᑦ ᐊᖑᓇᓱᖕᓂᕐᒧᑦ, ᐃᖅᑲᓇᐃᔮᒃᓴᑦ, ᑮᓇᐅᔭᓕᐅᕈᑎᖃᕈᓐᓇᕐᓂᖅ, ᐊᒻᒪᓗ ᐊᐅᓚᑦᑎᖃᑎᒌᖕᓂᖅ ᓄᓇᒦᙶᖅᑐᓂᒃ. ᓄᓇᕗᑦᒥ ᐊᖏᕈᑏᑦ ᒪᓕᒐᖅᑎᒍᑦ ᓇᓗᓇᐃᔭᐃᓯᒪᒻᒥᔪᑦ ᖃᓄᖅ ᐃᓄᐃᑦ ᑐᓴᕆᐊᕐᕕᐅᖃᑦᑕᕆᐊᖃᕐᒪᖔᑕ ᐃᓚᐅᑎᑕᐅᖃᑦᑕᕆᐊᖃᕐᒪᖔᑕᓗ ᐃᓱᒪᓕᐅᕈᑎᖃᕐᓂᐊᖅᑎᓪᓗᒋᑦ ᓄᓇᒥᐅᑕᓂᒃ ᐱᕙᓪᓕᐊᑎᑦᑎᓂᕐᒥᒃ ᓄᓇᕗᑦᒥ. ᑕᒪᓐᓇ ᐱᖃᓯᐅᔾᔨᔪᖅ ᐊᑐᖅᑕᐅᔭᕆᐊᓖᑦ ᐋᔩᖃᑎᒌᖕᓂᕐᒧᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᒡᓗ ᐊᖏᕈᑏᑦ. ᑕᒪᒃᑯᐊ ᐱᓕᕆᔾᔪᓰᑦ ᐊᒻᒪ ᒪᓕᒃᑕᐅᔭᕆᐊᓖᑦ ᐊᑐᖅᑐᑦ ᓇᓕᐊᖕᓄᑐᐃᓐᓇᖅ ᐊᑐᒃᑲᓐᓂᕈᓐᓇᖅᑐᓄᑦ ᐆᒻᒪᖅᑯᑎᓄᑦ ᐱᕙᓪᓕᐊᑎᑦᑎᓂᕐᒧᑦ ᓄᓇᕗᑦᒥᑦᑕᐅᖅ. ᐱᓕᕆᐊᒃᓴᓄᑦ ᓯᕗᓕᖅᑏᑦ ᒪᓕᒋᐊᖃᖅᐳᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᓄᓇᕗᑦ ᐊᖏᕈᑎᖏᑎᒍᑦ ᖃᓄᑐᐃᓐᓇᖅ ᖃᐅᔨᓴᖅᑐᖃᖅᑎᓪᓗᒍ, ᐱᕙᓪᓕᐊᑎᑦᑎᔪᖃᖅᑎᓪᓗᒍ, ᓴᓇᔪᖃᖅᑎᓪᓗᒍ, ᐊᐅᓚᑎᑦᑎᔪᖃᖅᑎᓪᓗᒍᓗ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓕᕆᔾᔪᑎᓂᒃ ᓄᓇᕗᑦᒥ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐱᖁᔭᖅ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ ᐱᖁᔭᖅ ᐊᐅᓚᑦᑎᔨᐅᕗᖅ ᐱᖁᔭᖅ ᓇᓗᓇᐃᔭᐃᓪᓗᓂ ᐱᓕᕆᐊᒃᓴᖏᓐᓂᒃ ᑲᒪᒋᔭᒃᓴᖏᓐᓂᒡᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ (QEC), ᐆᒻᒪᖅᑯᑎᓕᕆᔨᑐᐊᖑᓪᓗᓂ ᓄᓇᕗᑦᒥ, ᓇᖕᒥᓂᕆᔭᐅᓪᓗᓂ ᓄᓇᕗᑦ ᒐᕙᒪᒃᑯᓐᓄᑦ. ᐱᖁᔭᕐᔪᐊᖅ ᓇᓗᓇᐃᔭᐃᔪᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑐᕌᒐᖏᓐᓂᒃ, ᖃᓄᖅ ᐆᒻᒪᖅᑯᑎᓄᑦ ᐊᑭᑦᑐᕆᐊᕈᑕᐅᔪᒪᔪᑦ ᕿᒥᕐᕈᔭᐅᖃᑦᑕᕐᒪᖔᑕ ᐊᖏᖅᑕᐅᖃᑦᑕᕐᒪᖔᑕᓗ, ᖃᓄᖅ ᐊᖏᔫᑏᑦ ᐊᑭᑐᔫᑎᓄᑦ ᐱᓕᕆᐊᒃᓴᑦ (ᐅᖅᓱᐊᓗᖕᒧᑦ ᐆᒻᒪᖅᑯᑎᖃᕐᕖᑦ) ᕿᒥᕐᕈᔭᐅᖃᑦᑕᕐᒪᖔᑕ ᐊᖏᖅᑕᐅᖃᑦᑕᕐᒪᖔᑕᓗ, ᐊᒻᒪᓗ ᑮᓇᐅᔭᑎᒍᑦ ᓴᙱᓂᖏᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ. ᓇᓗᓇᐃᔭᐃᓯᒪᖕᒥᔪᖅ ᖃᓄᖅ ᐆᒻᒪᖅᑯᑏᑦ ᓴᓇᔭᐅᕙᖕᒪᖔᑕ, ᑐᓂᐅᖅᑲᖅᑕᐅᕙᖕᒪᖔᑕ, ᓂᐅᕐᕈᑕᐅᕙᖕᒪᖔᑕᓗ ᓄᓇᕗᑦᒥ. ᐱᖁᔭᕐᔪᐊᖅ ᐱᕕᖃᖅᑎᑦᑎᕗᖅ ᑎᒥᐅᔪᖅ ᐃᓚᐅᖃᑕᐅᔪᒪᔪᖅ ᐆᒻᒪᖅᑯᑎᓕᕆᓂᕐᒥᑦ ᓄᓇᕗᑦᒥᑦ ᒪᓕᒋᐊᖃᖅᐳᖅ ᒪᓕᒋᐊᓕᖕᓂᑦ ᐋᖅᑭᒃᑕᐅᓯᒪᔪᓂᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐱᖁᔭᖏᓐᓂᑦ.
ᐆᒻᒪᖅᑯᑎᓄᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᑕ ᐱᖁᔭᖓ
ᐆᒻᒪᖅᑯᑎᓄᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᑕ ᐱᖁᔭᖓ ᐱᔪᓐᓇᕐᓂᖃᖅᑎᑦᑎᕗᖅ ᓴᖅᑮᔪᓐᓇᕐᓂᕐᒥᒃ ᐱᓕᕆᐊᓂᒃ ᐱᕕᖃᖅᑎᑦᑎᔪᓂᒃ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓂᒃ ᐱᕙᓪᓕᐊᑎᑦᑎᓂᕐᒥᒃ ᐱᔪᓐᓇᖅᑎᑕᐅᔪᓄᑦ ᑲᑐᔾᔨᖃᑎᒌᓄᑦ (ᐊᒥᓲᓂᖅᓴᓄᑦ ᓇᖕᒥᓂᕆᔭᐅᒋᐊᓕᒃ ᐃᓄᖕᓄᑦ).
ᐆᒻᒪᖅᑯᑎᓄᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᑕ ᐱᖁᔭᖓ ᐆᒻᒪᖅᑯᑏᑦ ᐊᑭᖏᓐᓂᑦ ᕿᒥᕐᕈᔩᑦ ᑲᑎᒪᔨᖏᑦ ᐱᖁᔭᖅ ᓴᖅᑮᕗᖅ ᐆᒻᒪᖅᑯᑏᑦ ᐊᑭᖏᓐᓂᑦ ᕿᒥᕐᕈᔩᑦ ᑲᑎᒪᔨᖏᓐᓂᑦ (URRC)—ᐅᖃᐅᔾᔨᒋᐊᖅᑎᐅᓂᐊᖅᑐᓂᑦ ᒥᓂᔅᑕᒧᑦ ᑲᒪᒋᔭᓕᒻᒧᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ. ᒥᓂᔅᑕ, ᐃᓚᒋᓪᓗᒋᑦ ᓄᓇᕗᑦ ᒐᕙᒪᒃᑯᑦ ᒥᓂᔅᑕᐃᑦ ᑲᑎᒪᔨᖏᑦ, ᑲᒪᒋᔭᖃᓪᓚᕆᒃᐳᑦ ᐋᖅᑮᓂᕐᒥᒃ ᐆᒻᒪᖅᑯᑎᓄᑦ ᐊᑭᖏᓐᓂᒃ ᓄᓇᕗᑦᒥ. ᑐᒃᓯᕋᕈᓐᓇᖅᑐᑦ ᐆᒻᒪᖅᑯᑎᓄᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᑕ ᐱᖁᔭᒃᑯᓐᓂᑦ ᐃᑲᔪᖅᑕᐅᔪᒪᓗᑎᒃ ᕿᒥᕐᕈᖁᓪᓗᒋᑦ ᑐᒃᓯᕋᐅᑎᓂᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂᑦ ᐊᑭᑦᑐᕆᐊᕈᑎᒃᓴᓂᒃ ᐊᒻᒪᓗ ᐊᑐᓕᖁᔭᓕᐅᕐᓗᑎᒃ. ᑖᒃᑯᐊ ᐆᒻᒪᖅᑯᑎᓄᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᑕ ᐱᖁᔭᒃᑯᑦ ᑎᒍᒥᐊᖅᑎᓪᓗᐊᑕᐅᕗᑦ ᓇᓗᓇᐃᖅᓯᑎᓪᓗᒋᑦ ᐆᒻᒪᖅᑯᑎᓄᑦ ᐊᑭᖏᓐᓂᒃ ᓄᓇᕗᑦᒥ.
ᑲᓇᑕᐅᑉ ᐱᖁᔭᕐᔪᐊᖓ
ᑲᓇᑕᐅᑉ ᐱᖁᔭᕐᔪᐊᖓ ᓇᓗᓇᐃᖅᓯᓯᒪᖕᒪᑦ ᑲᓇᑕᐅᑉ ᒐᕙᒪᑐᖃᒃᑯᖏᑦᑕ ᒪᓕᒐᓕᐅᕐᕕᔾᔪᐊᖓᓂ ᓂᕈᐊᕈᓐᓇᕐᓂᕐᒥᒃ. ᐋᖅᑮᓯᒪᔪᖅ ᐱᔪᓐᓇᕐᓂᕆᔭᖏᓐᓂᒃ ᒐᕙᒪᑐᖃᒃᑯᑦ, ᐊᕕᑦᑐᖅᓯᒪᔪᓂ, ᐊᒻᒪᓗ ᐅᑭᐅᖅᑕᖅᑐᒥ ᒐᕙᒪᐃᑦ; ᑲᓇᑕᒥ ᒪᓕᒐᓕᐊᕆᔭᓂᒃ ᖃᐅᔨᓴᖅᑏᑦ; ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓ; ᐃᓕᑕᖅᓯᓯᒪᓪᓗᑎᒡᓗ ᐃᓄᐃᑦ ᐱᔪᓐᓇᐅᑎᖏᓐᓂᒃ. ᓈᓴᐅᑎᓕᒃ 35 ᑖᒃᓱᒧᖓ ᐱᖁᔭᕐᒧᑦ ᓇᓗᓇᐃᖅᓯᕗᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ ᓇᓗᓇᐃᖅᑕᐅᓯᒪᓂᖓ ᒪᓕᒡᓗᒍ ᓄᓇᕗᑦᒥ ᓄᓇᑖᕐᓂᕐᒧᑦ ᐊᖏᕈᑎᓂ. ᑖᓐᓇ ᓇᓗᓇᐃᖅᑕᐅᑎᓪᓗᒍ ᒐᕙᒪᑐᖃᒃᑯᑦ ᑲᒪᒋᔭᖃᕆᐊᖃᕐᒪᑕ ᐃᓄᐃᑦ ᐅᖃᖃᑎᒋᔭᐅᑦᑎᐊᖅᓯᒪᒐᓗᐊᕐᒪᖔᑕ ᓄᓇᒥᐅᑕᓂᒃ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᑦ ᑲᔪᓯᑎᑕᐅᓚᐅᙱᓐᓂᖏᓐᓂᒃ. ᑖᓐᓇ ᐱᔭᒃᓴᖅ ᑐᓴᕆᐊᕐᕕᖃᕐᓂᖅ ᐱᑕᖃᖅᐳᖅ ᐊᑐᒃᑲᓐᓂᕈᓐᓇᖅᑐᓄᑦ ᐆᒻᒪᖅᑯᑎᓄᑦ ᐱᓕᕆᐊᓄᑦ ᐊᓯᖏᓐᓄᒡᓗ ᓄᓇᒥᐅᑕᓂᒃ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᓄᑦ ᓄᓇᕗᑦᒥ, ᓲᕐᓗ ᐅᔭᕋᖕᓂᐊᕐᕕᖕᓄᑦ ᑮᓇᐅᔭᓕᐅᕈᑎᒃᓴᓄᒡᓘᓐᓃᑦ ᐃᖃᓗᓕᕆᓂᕐᒧᑦ ᐱᕙᓪᓕᐊᑎᑦᑎᓂᕐᒧᑦ.
ᓄᓇᕗᑦᒥ ᐸᕐᓇᐃᓂᕐᒧᑦ ᐊᒻᒪᓗ ᐱᓕᕆᐊᒃᓴᓂᒃ ᖃᐅᔨᓴᕐᓂᕐᒧᑦ ᐱᖁᔭᖅ
ᓄᓇᕗᑦᒥ ᐸᕐᓇᐃᓂᕐᒧᑦ ᐱᓕᕆᐊᒃᓴᓂᒃ ᖃᐅᔨᓴᕐᓂᕐᒧᑦ ᐱᖁᔭᖅ (NuPPA) ᓇᓗᓇᐃᔭᐃᔪᖅ ᕿᒥᕐᕈᓇᖕᓂᕐᒧᑦ ᐊᖏᖅᑕᐅᓂᕐᒧᓪᓗ ᐱᓕᕆᔾᔪᓯᐅᔪᓂᒃ ᓄᓇᒥᐅᑕᓂᒃ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᒃᓴᓄᑦ ᓄᓇᕗᑦᒥ. ᓄᓇᕗᑦᒥ ᐸᕐᓇᐃᔩᑦ (NPC) ᐊᒻᒪᓗ ᓄᓇᕗᑦᒥ ᐊᒃᑐᖅᑕᐅᓂᕐᒧᑦ ᕿᒥᕐᕈᔩᑦ (NIRB) ᑕᒪᕐᒥᒃ ᐋᖅᑭᑦᑕᐅᓯᒪᔫᒃ ᑖᒃᑯᑎᒎᓇ ᐱᖁᔭᕐᔪᐊᑎᒍᑦ.
ᓄᓇᕗᑦᒥ ᐸᕐᓇᐃᓂᕐᒧᑦ ᐊᒻᒪᓗ ᐱᓕᕆᐊᒃᓴᓂᒃ ᖃᐅᔨᓴᕐᓂᕐᒧᑦ ᐱᖁᔭᒃᑯᑦ “ᐊᑕᐅᓯᕐᒥᒃ ᐃᒐᓛᖃᖅᐳᑦ” ᕿᒥᕐᕈᓂᕐᒧᑦ ᐱᓕᕆᔾᔪᓯᕐᒥᒃ, ᑕᒪᕐᒥᒃ ᐱᓕᕆᐊᒃᓴᓄᑦ ᓯᕗᓕᖅᑎᐅᔪᑦ ᑐᓂᓯᔭᕆᐊᖃᖅᐳᑦ ᑐᒃᓯᕋᐅᑎᒥᒃ ᓄᓇᕗᑦᒥ ᐸᕐᓇᐃᔨᒃᑯᓐᓄᑦ. ᓯᕗᓂᒃᓴᒥ ᕿᒥᕐᕈᓂᐅᔪᑦ, ᐊᖏᖅᑕᐅᓂᐅᔪᑦ, ᐱᔪᓐᓇᐅᑎᐅᔪᑦ, ᐊᒻᒪᓗ ᓇᓪᓕᐅᒃᑯᒫᑦ ᐱᓕᕆᐊᒧᑦ ᑕᐃᑲᙵᑦ ᐱᒋᐊᕐᕕᒋᓚᐅᖅᑕᖓᓂᒃ. ᓄᓇᕗᑦᒥ ᐸᕐᓇᐃᓂᕐᒧᑦ ᐊᒻᒪᓗ ᐱᓕᕆᐊᒃᓴᓂᒃ ᖃᐅᔨᓴᕐᓂᕐᒧᑦ ᐱᖁᔭᓂᒃ ᓇᓗᓇᐃᖅᓯᓯᒪᖕᒥᔪᖅ ᖃᓄᑎᒋ ᐊᑯᓂᐅᑎᒋᔪᖅ ᐱᐊᓂᒋᐊᕆᐊᖃᕐᒪᖔᑕ ᐊᕙᑎᓕᕆᓂᕐᒧᑦ ᖃᐅᔨᓴᐃᓂᕐᒥᒃ ᐊᒻᒪᓗ ᐱᓕᕆᐊᒃᓴᖏᑦ ᐱᔪᓐᓇᕐᓂᖃᖅᑎᑕᐅᓂᖏᒡᓗ ᐃᓄᐃᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ. ᓄᑖᙳᕆᐊᖅᑎᑕᐅᔪᓐᓇᖅᑐᓄᑦ ᐆᒻᒪᖅᑯᑎᓄᑦ ᐱᓕᕆᐊᒃᓴᑦ ᒪᓕᒋᐊᖃᖅᐳᑦ ᑖᒃᓱᒥᖓ ᒪᓕᒐᕐᒥᒃ ᐊᒻᒪ ᑕᒪᕐᒥᒃ ᕿᒥᕐᕈᓂᐅᔪᑦ, ᐱᔪᓐᓇᐅᑎᑖᖅᑎᑕᐅᓂᖅ, ᐱᔪᓐᓇᐅᑎᑦ, ᐊᒻᒪ ᓇᓪᓕᐅᒃᑯᒫᓂᑦ ᓄᑖᙳᕆᐊᖅᑎᑕᐅᔪᓐᓇᖅᑐᓄᑦ ᐆᒻᒪᖅᑯᑎᓄᑦ ᐱᓕᕆᐊᒧᑦ ᑐᓂᔭᐅᓂᐊᖅᐳᑦ ᓄᓇᕗᑦᒥ ᐸᕐᓇᐃᓂᕐᒧᑦ ᐊᒻᒪᓗ ᐱᓕᕆᐊᒃᓴᓂᒃ ᖃᐅᔨᓴᕐᓂᕐᒧᑦ ᐱᖁᔭᑎᒍᑦ.