ᐱᓕᕆᐊᕆᔭᕋ ᐃᓚᖃᖅᑐᖅ ᐊᐅᓚᑦᑎᓂᕐᒥᑦ ᖃᐅᔨᒪᔨᑕᑦᑎᓐᓂᑦ ᐱᓕᕆᐊᖃᖅᑐᓂᑦ ᐃᖃᓗᓐᓂ ᓄᒃᑭᒃᓴᐅᑏᑦ ᐱᓕᕆᐊᖓᓂᑦ, ᐊᒻᒪᓗᑦᑕᐅᖅ ᐋᖅᑭᒃᓱᐃᓂᕐᒥᑦ ᐊᒻᒪ ᑮᓇᐅᔭᓂᑦ ᐊᑐᖅᑐᒃᓴᓂᑦ ᐋᖅᑭᔅᓱᐃᓂᕐᒥᑦ. ᑕᒪᑐᒥᖓ ᐃᖅᑲᓇᐃᔮᖅᑖᓚᐅᙱᑎᓪᓗᖓ, ᐅᑭᐅᖅᑕᖅᑐᒧᑦ ᐊᒃᑐᐊᓂᖃᓚᐅᖏᑦᑐᖓ. ᐱᕈᖅᓯᒪᓕᕋᒪ ᐃᒃᐱᒍᓱᑦᑎᐊᓕᖅᑐᖓ ᖃᓄᑎᒋ ᐊᒃᓱᕈᕐᓇᕐᓂᖅᓴᐅᖕᒪᖔᑦ ᐱᓕᕆᐊᒃᓴᓂᒃ ᐱᕙᓪᓕᐊᑎᑦᑎᓂᖅ, ᐊᒻᒪᓗ ᖃᓄᖅ ᑕᒪᒃᑯᐊ ᐊᒃᓱᕈᕐᓇᕐᓂᐅᔪᑦ ᓴᖅᑭᔮᖅᑎᑕᐅᕙᖕᒪᖔᑕ ᖃᐅᑕᒫᑦ ᐃᓅᓯᕆᔭᐅᔪᒥ ᓄᓇᕗᑦᒥᐅᓄᑦ.
ᐃᓕᓐᓂᐊᓚᐅᖅᓯᒪᒐᒪ ᓴᓇᔨᒻᒪᕆᐅᓂᕐᒧᑦ ᓯᓚᑦᑐᓴᕐᕕᔾᔪᐊᖓᓂ ᓂᐅᕙᓐᓛᓐ. ᐱᔭᕇᓚᐅᖅᑎᓪᓗᖓ ᐸᐃᑉᐹᖅᑖᕋᓱᐊᕐᓂᓐᓂᒃ, ᐃᖅᑲᓇᐃᔭᓕᓚᐅᖅᐳᖓ ᓄᑖᙳᕆᐊᖅᑎᑕᐅᔪᓐᓇᖅᑐᓂᒃ ᐱᓕᕆᐊᓂᒃ ᑲᓇᑕᓕᒫᒥ. ᑖᒃᑯᐊ ᐱᓕᕆᐊᖑᔪᑦ ᐃᓚᖃᓚᐅᖅᑐᑦ ᐊᓄᕆᒧᑦ, ᓯᕿᓂᕐᒧᑦ, ᐊᒻᒪᓗ ᐃᒪᕐᒧᑦ ᐆᒻᒪᖅᑯᑎᓄᑦ. ᐃᖅᑲᓇᐃᔮᕆᔭᒪ ᐊᒥᓲᓂᖅᓴᖓ ᐊᑐᖅᓯᒪᔭᕋ ᐊᓄᕆᒧᑦ ᐆᒻᒪᖅᑯᑎᓕᐅᕐᓂᕐᒧᑦ.