ᐃᖃᓗᖕᓂ ᐃᓅᓚᐅᖅᓯᒪᒐᒪ ᐱᕈᖅᓴᓪᓗᖓᓗ ᕿᑐᕐᖓᒃᑲᓗ ᑕᒫᓂ ᐱᕈᖅᓴᖅᖢᒋᑦ. ᓄᓇᕗᑦᒥ ᓄᑭᒃᓴᐅᑏᑦ ᑯᐊᐳᕇᓴᖓᓅᓚᐅᖅᓯᒪᕗᖓ ᐊᕐᕌᒍᓄᑦ ᐊᕙᑎᓄᑦ ᐃᖅᑲᓇᐃᔭᓕᒪᓪᓗᖓ, ᐱᓗᐊᖅᑐᒥ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᐅᓪᓗᖓ ᓄᓇᕗᑦ ᒐᕙᒪᒃᑯᓐᓄᑦ. ᐱᒋᐊᓕᓵᖅᑎᓪᓗᖓ ᓄᓇᕗᑦᒥ ᓄᒃᑭᒃᓴᐅᑎᓄᑦ ᑯᐊᐳᕇᓴᒃᑯᓐᓄᑦ, ᐊᖏᖅᑕᐅᓚᐅᖅᓯᒪᒐᒪ ᐊᒻᒪᓗ ᐱᔭᕇᖅᑕᐅᓪᓗᖓ 20/20 ᑲᔪᓯᑎᑦᑎᔾᔪᑎ ᐱᓕᕆᐊᖅ ᓄᓇᖃᖅᑳᖅᓯᒪᔪᓄᑦ ᓴᓗᒪᔪᒥᒃ ᐆᒻᒪᖅᑯᑎᖃᕐᓂᕐᒧᑦ, ᑖᓐᓇᓗ ᑕᖅᑭᓄᑦ 6-ᓄᑦ ᐱᓕᒻᒪᒃᓴᕈᑕᐅᓪᓗᓂ ᐃᓄᖕᓄᑦ, ᐊᓪᓚᖓᔪᑦ ᐊᒻᒪᓗ ᐃᖅᑭᓖᑦ ᓄᓇᖃᖅᑳᖅᓯᒪᔪᑦ ᐱᕙᓪᓕᐊᑎᑦᑎᔪᓄᑦ ᓴᓗᒪᔪᒥᒃ ᐆᒻᒪᖅᑯᑎᖃᕐᓂᕐᒧᑦ ᐱᓕᕆᐊᓂᒃ.
ᐃᑲᔪᖅᑐᐃᕙᒃᑲᒪ ᖃᓄᐃᓕᐅᕐᓂᐅᔪᓂᒃ, ᐋᖅᑭᒃᓱᐃᓂᐅᔪᓂᒃ, ᐊᒻᒪᓗ ᑐᓴᐅᒪᖃᑦᑕᐅᑎᓂᐅᔪᓂᒃ ᑭᒃᑯᑐᐃᓐᓇᕐᓂᒃ ᐃᓚᐅᑎᑦᑎᓇᓱᐊᕐᓂᕐᒧᑦ, ᐱᓗᐊᖅᑐᒥᒃ ᐃᖃᓗᖕᓂ ᓄᒃᑭᒃᓴᐅᑏᑦ ᐱᓕᕆᐊᖓᓄᑦ. ᑐᓴᐅᒪᖃᑎᖃᖃᑦᑕᖅᑐᖓ ᓄᓇᓕᖕᓂ ᓯᕗᓕᖅᑎᐅᔪᓂᒃ ᑐᑭᒧᐊᒃᑎᑦᑎᔨᐅᖁᓪᓗᒋᑦ ᓄᓇᓕᖕᓂ ᐱᔭᐅᔭᕆᐊᓕᖕᓂᒃ, ᒪᕐᕉᖕᓂᒃ ᑐᕌᖓᔪᓂᒃ ᑐᓴᒐᒃᓴᓂᒃ ᑲᑐᔾᔨᓂᕐᒥᒃ, ᑭᒃᑯᑐᐃᓐᓇᐃᑦ ᐃᓚᐅᓂᖏᓐᓂᒃ, ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪᓗ ᑐᓴᒐᒃᓴᓂᒃ ᑲᑎᑕᐅᓂᖏᓐᓂᒃ, ᐊᒻᒪᓗ ᐃᑲᔫᑎᒃᓴᓂᒃ ᑲᑐᔾᔨᓂᕐᒧᑦ ᐸᕐᓇᐅᑎᓂᒃ.