ᐱᓕᕆᐊᕆᔭᕋ ᐃᑲᔪᖅᑐᐃᓗᖓ ᐃᖅᑲᓇᐃᔭᖅᑎᖁᑎᑦᑎᓐᓂᒃ ᑐᕌᒐᒃᓴᒥᓂᒃ ᑎᑭᐅᑎᓇᓱᐊᖅᑎᓪᓗᒋᑦ ᑐᑭᒧᐊᒃᑎᑦᑎᓗᖓᓗ ᐊᖅᑯᑎᒃᓴᓂᒃ ᑲᔪᓯᑦᑎᐊᖁᓪᓗᒋᑦ ᐱᓕᕆᐊᑦ ᐊᒻᒪᓗ ᑲᒻᐸᓂᓕᒫᖅ. ᑲᒪᒋᔭᖃᖅᐳᖓ ᖃᐅᑕᒫᖅᓯᐅᑎᓂᑦ ᐊᐅᓚᑦᑎᓂᕐᒥᑦ ᓄᓇᕗᑦᒥ ᓄᑭᒃᓴᐅᑏᑦ ᑯᐊᐳᕇᓴᖓᓐᓂᑦ, ᐱᔪᓐᓇᕐᓂᖅᑖᖅᑎᑦᑎᓂᕐᒥᑦ, ᐊᒻᒪ ᑮᓇᐅᔭᓕᕆᓂᕐᒥᑦ/ᑮᓇᐅᔭᓕᐅᕋᓱᐊᕐᓂᕐᒥᑦ ᐊᐅᓚᑦᑎᓂᕐᒥᑦ. ᐅᖃᐅᔾᔨᒋᐊᖅᑎᐅᕙᒃᑲᒪ ᑖᒃᑯᓂᖓ ᐱᓕᕆᐊᒃᓴᓂᒃ ᐱᕙᓪᓕᐊᑎᑦᑎᓂᕐᒥᒃ, ᐊᑐᐊᒐᕐᓂᒃ ᐃᑲᔪᖅᑐᐃᓂᕐᒥᒃ, ᑮᓇᐅᔭᓕᐅᕋᓱᐊᕐᓂᕐᒧᑦ ᐋᔩᖃᑎᒌᖕᓂᕐᒥᒃ, ᐊᒻᒪᓗ ᑮᓇᐅᔭᓂᒃ ᑐᒃᓯᕋᐅᑎᓂᒃ. ᓄᓇᕗᑦᒥ ᓄᑭᒃᓴᐅᑏᑦ ᑯᐊᐳᕇᓴᖓᓐᓄᑦ ᐃᓚᐅᓕᓵᖅᑎᓪᓗᖓ ᐃᖅᑲᓇᐃᔭᖅᑎᑑᓚᐅᖅᑐᖓ ᐊᒻᒪᓗ ᐱᖓᓱᓂᒃ ᐱᓕᕆᐊᒃᓴᖃᓚᐅᖅᑐᒍᑦ. ᑕᐃᒪᙵᓂᑦ, ᐱᕈᖅᓯᒪᔪᒍᑦ 8-ᓄᑦ ᐃᖅᑲᓇᐃᔭᖅᑎᓄᑦ, ᐅᖓᑖᓄᑦ 30 ᒥᒐᕚᑦ ᐆᒻᒪᖅᑯᑏᑦ ᐱᕙᓪᓕᐊᑎᑕᐅᑎᓪᓗᒋᑦ ᕿᑭᖅᑕᓂ ᐊᕕᒃᑐᖅᓯᒪᔪᓕᒫᒥ.
ᐱᔭᕇᖅᔪᓯᐊᓚᐅᖅᑐᖓ ᑯᐊᐳᕇᓴᒃᑯᑦ ᓇᐃᑦᔅᑯᖏᓐᓄᑦ ᖁᑦᑎᓂᖅᐹᓄᑦ 30-ᓄᑦ 30 ᑐᖔᓂ ᒪᑭᒪᐃᓐᓇᕈᓐᓇᕐᓂᕐᒧᑦ ᓯᕗᓕᖅᑎᓄᑦ ᑲᓇᑕᒥ ᑎᑎᕋᖅᓯᒪᔪᓄᑦ 2021-ᒥ ᐊᒻᒪᓗ ᑐᓂᔭᐅᓚᐅᖅᑐᖓ ᓴᓗᒪᔪᒥᒃ 50-ᒥᒃ ᐃᓕᓴᕆᔭᐅᔾᔪᑎᒥᒃ ᐆᒻᒪᖅᑯᑎᓕᕆᓂᕐᒧᑦ 2024-ᒥ ᐱᓕᕆᐊᕆᖃᑦᑕᖅᑕᓐᓄᑦ ᓄᓇᕗᑦ ᓄᑭᒃᓴᐅᑎᒃᑯᑦ ᑯᐊᐳᕇᓴᒃᑯᖏᓐᓄᑦ.
ᐸᐃᑉᐹᖅᑖᖅᓯᒪᔪᖓ ᐱᔭᕇᔾᔪᓯᐊᖅ ᐊᕙᑎᓕᕆᓂᕐᒧᑦ, ᓄᓇᙳᐊᓕᕆᓂᕐᒧᑦ, ᐊᒻᒪᓗ ᐱᖅᑯᓯᑐᖃᓕᕆᓂᕐᒧᑦ ᒫᐅᓐᑦ ᐋᓕᓴᓐ ᐱᔭᕇᔾᖅᔪᓯᐊᖅ ᓯᓚᑦᑐᖅᓴᕐᕕᔾᔪᐊᖓᓂ ᐊᒻᒪᓗ ᖁᑦᑎᖕᓂᖅᓴᒥᒃ ᐸᐃᑉᐹᖅᑖᖅᓯᒪᓪᓗᖓ ᐃᓕᖅᑯᓯᓕᕆᓂᕐᒧᑦ ᖃᐅᔨᓴᕐᓂᕐᒥᒃ ᐊᒻᒪᓗ ᐃᓅᓯᓕᕆᓂᕐᒥᒃ ᐅᐃᓪᕗᕆᑦ ᓘᕆᐊᐃ ᓯᓚᑦᑐᖅᓴᕐᕕᔾᔪᐊᖓᓂ. ᐸᐃᑉᐹᖅᑖᖅᓯᒪᕗᖓ ᐆᒻᒪᖅᑯᑎᓕᕆᓂᕐᒧᑦ ᓴᓇᔨᐅᓂᕐᒧᑦ ᐊᒻᒪ ᓴᐳᔾᔨᓂᕐᒧᑦ ᑖᓪᕼᐊᐅᓯ ᓯᓚᑦᑐᖅᓴᕐᕕᒡᔪᐊᖓᓂ, ᐊᒻᒪ ᒫᓐᓇᐅᔪᖅ ᖁᑦᑎᖕᓂᕐᐹᒥᒃ ᒪᓕᒐᓕᕆᓂᕐᒧᑦ ᐱᔭᕇᕈᓯᐊᖅᑖᕐᓂᕐᒧᑦ ᐱᓕᕆᐊᖑᕙᒃᑐᖅ ᐆᒻᒪᖅᑯᑎᓕᕆᓂᕐᒧᑦ ᓇᒃᐸᖅᑎᑕᐅᓯᒪᔪᓄᒡᓗ ᒪᓕᒐᓕᕆᓂᕐᒥᒃ ᓂᕈᐊᒐᒃᓴᐅᕗᖓ ᐆᒻᒪᖅᑯᑎᓕᕆᓂᕐᒧᑦ ᐊᒻᒪ ᐱᖁᑎᕐᔪᐊᓄᑦ ᒪᓕᒐᓕᕆᓂᕐᒧᑦ ᐋᔅᒍᑦ ᕼᐋᓪ ᒪᓕᒐᓕᕆᓂᕐᒧᑦ ᐃᓕᓐᓂᐊᕐᕕᖓᓂ ᔪᐊᒃ ᓯᓚᑦᑐᖅᓴᕐᕕᒡᔪᐊᖓᓂ. ᓇᓗᓇᐃᒃᑯᑕᖅᑖᖅᓯᒪᖕᒥᔪᖓ ᐆᒻᒪᖅᑯᑎᓕᕆᓂᕐᒧᑦ ᐊᐅᓚᑦᑎᔨᐅᓂᕐᒧᑦ (CEM) ᐊᒻᒪᓗ ᓇᓗᓇᐃᒃᑯᑕᖅᑖᖅᓯᒪᓪᓗᖓ ᐊᕙᑎᓕᕆᓂᕐᒧᑦ ᖃᐅᔨᒪᔨᒻᒪᕆᐅᓂᕐᒧᑦ (EP) ᐆᒻᒪᖅᑯᑎᓕᕆᓂᕐᒥᒃ ᖃᐅᔨᒪᓂᖃᖅᑐᖓ. ᐃᖅᑲᓇᐃᔮᕆᓯᒪᔭᕋ ᓄᓇᓕᖕᓂ ᓄᑖᕈᕆᐊᕈᓐᓇᖅᑐᓂᒃ ᐆᒻᒪᖅᑯᑎᓂᒃ ᐱᕙᓪᓕᐊᑎᑦᑎᓂᕐᒥᒃ, ᐃᖅᑲᓇᐃᔭᖃᑦᑕᖅᓯᒪᓪᓗᖓ ᓄᓇᓕᖕᓂ ᐊᓄᕆᒧᑦ ᓯᕿᓂᕐᒧᓪᓗ ᐱᓕᕆᐊᓂᒃ ᑲᓇᑕᓕᒫᒥ ᐊᒻᒪᓗ ᐅᑭᐅᖅᑕᖅᑐᒥ ᐊᒥᐊᓕᒐᐃᑦ ᓄᓇᖓᓐᓂ. ᒫᓐᓇ ᑲᑎᒪᔨᐅᖃᑕᐅᕗᖓ ᐅᑭᐅᖅᑕᖅᑐᒥ ᐊᑐᒃᑲᓐᓂᕈᓐᓇᖅᑐᓄᑦ ᑲᑐᔾᔨᖃᑎᒌᓄᑦ ᐃᖃᓗᖕᓂ, ᓄᓇᑦᑎᐊᕐᒥ ᐊᒻᒪᓗ ᓂᕈᐊᖅᑕᐅᓯᒪᓪᓗᖓ ᑲᑎᒪᔨᐅᖃᑕᐅᓪᓗᖓ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑲᓇᑕᒥ ᒪᑭᒪᔾᔪᑎᒃᓴᓄᑦ ᐱᕙᓪᓕᐊᑎᑦᑎᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᓐᓄᑦ.
ᓄᓇᖃᖅᓯᒪᕗᖓ ᐃᖅᑲᓇᐃᔭᖅᓯᒪᓪᓗᖓᓗ ᐃᖃᓗᖕᓂ ᑕᐃᒪᙵᓂ 2019-ᒥᓂᑦ, ᐊᒻᒪ ᐊᓃᑲᑕᒋᐊᒃᓴᖅ ᖁᕕᐊᒋᔭᕋ, ᐱᓗᐊᖅᑐᒥ ᐊᐃᑉᐸᕋ, ᑕᐃᕕᑦ ᐊᒻᒪ ᕿᒻᒥᕋ, ᓯᑲᐅᑦ. ᓄᓇᕗᑦ ᐱᒋᐊᒃᑲᓐᓂᖅᓯᒪᓕᖅᐳᖅ ᐱᔪᒪᓂᕆᔭᖕᓂᒃ ᒪᑭᒪᐃᓐᓇᕈᓐᓇᕐᓂᕐᒧᑦ ᐊᒻᒪᓗ ᐃᑭᑦᑎᒃᑲᓐᓂᖅᖢᒍ ᐃᑲᔪᖅᑐᐃᔪᒪᓂᓐᓂᒃ ᐃᓄᐃᑦ ᓯᕗᓕᖅᑎᐅᓂᖏᓐᓂᒃ ᐅᖅᓱᐊᓗᑐᐃᓐᓇᕐᒥᒃ ᐊᑐᕈᓐᓃᖅᑎᓪᓗᑕ. ᐅᒃᐱᕈᓱᓪᓚᕆᒃᑲᒪ ᓯᕗᓂᒃᓴᖃᕐᓂᐊᕐᓂᖓᓂᒃ ᓄᓇᕗᑦ ᐆᒻᒪᖅᑯᑏᑦ ᐊᑦᑕᓇᔾᔭᐃᖅᓯᒪᑦᑎᐊᕐᓗᑎᒃ, ᑮᓇᐅᔭᓕᕆᓂᕗᑦ ᒪᑭᒪᔾᔪᑎᒃᓴᕗᓪᓗ ᒪᑭᒪᐃᓐᓇᕈᓐᓇᕐᓗᑎᒃ, ᐊᒻᒪᓗ ᐃᓄᐃᑦ ᓇᖕᒥᓂᖅᓱᕐᓂᖏᑦ ᓴᙱᔫᓗᑎᒃ.